Presidenti Ismet Krasniqi ka pritur delegacionin e kick-boksit të Kosovës, pas suksesit të arritur në Kupën e Botës “Wako Turkish Open”, ku fituan gjashtë medalje, prej tyre dy të argjendta dhe katër të bronzta.
Presidenti Krasniqi përgëzoi garuesit, trajnerët dhe federatën për suksesin e arritur, duke i inkurajuar që të vazhdojnë të punojnë dhe t’i sjellin vendit edhe medalje nga garat tjera ndërkombëtare.
Kryetari i Federatës së Kick-Boxit të Kosovës, Fatmir Makolli, duke falënderuar të parin e KOK-ut për pritjen, foli për sfidat dhe arritjen e garuesve, për të cilët tha se janë e ardhmja e kick-boksit në Kosovë.
Para kësaj gare, të mbajtur në Antalia të Turqisë, Makolli u zgjodh anëtar i Bordit Ekzekutiv të Federatës Mesdhetare të Wako Kick-Boksit.
Ekipi i kick-boksit të Kosovës është kthyer me gjashtë medalje, dy të argjendta dhe katër të bronzta, nga gara ndërkombëtare Kupa e Botës “Wako Turkish Open”, të mbajtur prej 14-18 maj në Antalia të Turqisë.
Medaljet e argjendta i fituan Nart Mehmeti dhe Gent Hyseni. I pari realizoi tri fitore, ndërsa i dyti dy sosh.
Medaljet e bronzta i fituan Artor Mehmeti e Omar Thaçi, të cilët shënuan nga dy fitore, si dhe Donjeta Menxhiqi e Gëzim Morina, që fituan nga një luftë.
