Ushtarët amerikanë të Komandës Lindore të KFOR-it kanë realizuar sot patrullime në disa komunitete lokale në të gjithë territorin e Kosovës.
Sipas njoftimit zyrtar të misionit të NATO-s në Kosovë, patrullimet janë pjesë e angazhimeve të rregullta të KFOR-it dhe kanë për qëllim të kontribuojnë në sigurinë dhe stabilitetin e përgjithshëm të zonës.
“Përmes këtyre përpjekjeve, KFOR-i përforcon angazhimin e tij për paqe të qëndrueshme, duke siguruar një mjedis të sigurt për të gjitha komunitetet në të gjithë rajonin,” thuhet në deklaratën e KFOR-it.
Ky mision ushtarak vazhdon të veprojë në përputhje me Rezolutën 1244 të Këshillit të Sigurimit të OKB-së të vitit 1999, duke garantuar një mjedis të sigurt dhe të qëndrueshëm si dhe lirinë e lëvizjes për të gjithë qytetarët e Kosovës, në mënyrë të paanshme dhe të pandërprerë.
“KFOR-i vazhdon të zbatojë mandatin e tij për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe për të garantuar lirinë e lëvizjes në çdo kohë,” thuhet më tej në njoftim.
Misioni nënvizon gjithashtu se operon në bashkëpunim të ngushtë me Policinë e Kosovës dhe me EULEX-in, në përputhje me rolet dhe përgjegjësitë e secilës strukturë në fushën e sigurisë.
