Brigada e Zjarrfikësve në Ferizaj është pajisur me një donacion nga Brigada Shumëkombëshe Lindje e KFOR-it amerikan, e cila është e vendosur në kampin “Bondsteel”, në kuadër të bashkëpunimit ndërmjet dy institucioneve.
Në ceremoninë e dorëzimit të pajisjeve mori pjesë drejtori i Drejtorisë së Shërbimeve Publike dhe Emergjencave në Komunën e Ferizajt, Alberton Sahiti, ndërsa donacionin e pranoi komandanti i Brigadës së Zjarrfikësve, Zymri Krasniqi.
Me këtë rast, Krasniqi vlerësoi mbështetjen si një kontribut të rëndësishëm për brigadën, duke theksuar se pajisjet e reja do të përmirësojnë kushtet e punës dhe do të rrisin kapacitetet operative të zjarrfikësve në përballimin e situatave emergjente.
Në kuadër të ceremonisë u nënshkrua edhe një memorandum bashkëpunimi ndërmjet Brigadës Shumëkombëshe Lindje të KFOR-it dhe Brigadës së Zjarrfikësve në Ferizaj, i cili synon forcimin e koordinimit dhe bashkëpunimit në fushën e emergjencave.
Drejtori Alberton Sahiti falënderoi përfaqësuesit e KFOR-it për mbështetjen e vazhdueshme, duke theksuar se partneriteti mes dy institucioneve do të vazhdojë edhe në të ardhmen.
