Policia e Kosovës ka zhvilluar një aksion të gjerë në veri të vendit, ku në gjashtë raste të ndara ka zbuluar dhe sekuestruar armë, municion dhe pajisje të tjera ilegale në komunën e Zubin Potokut.
Sipas njoftimit të Drejtorisë Rajonale të Policisë në Mitrovicë Veri, operacioni është realizuar pas informatave të pranuara nga qytetarët, ndërsa kontrollet janë kryer në disa lokacione në fshatrat Banovë dhe Prevllak.
Në rastin e parë, gjatë kontrollit në një shtëpi të pabanuar, policia ka gjetur katër pushkë të llojeve të ndryshme, 223 fishekë, tre radio-lidhje, një kamerë, uniforma ushtarake si dhe pajisje për pastrimin e armëve.
Në rastin e dytë, në një shtëpi tjetër është sekuestruar një pushkë pa leje dhe tre fishekë. Në vendngjarje është hasur një person me inicialet M.R. (1972), i cili është shoqëruar në stacion policor. Pas intervistimit, me urdhër të prokurorit ai është liruar në procedurë të rregullt, ndërsa rasti ndaj tij do të hetohet për armëmbajtje pa leje.
Në rastin e tretë, në një tjetër objekt të pabanuar, janë gjetur një armë automatike AK-47, tre karikatorë, 88 fishekë dhe një granatë dore M75 e prodhimit jugosllav. Njësitë për trajtimin e mjeteve shpërthyese (EOD) kanë intervenuar në vendngjarje, duke e tërhequr granatën në mënyrë të sigurt.
Ndërkaq, në rastet e tjera, policia ka sekuestruar edhe armë të tjera, përfshirë pushkë AK-47, një pushkë M48 (e çmontuar), pushkë gjuetie, si dhe pajisje të ndryshme ushtarake si mekanizëm i armës së gjatë, bajonetë dhe uniforma. Këto janë gjetur kryesisht në objekte të pabanuara dhe në një hambar.
