Përmes një komunikate, Këshilli shprehet se vetëm mësimdhënësit nuk janë paguar kurse grevistët në sektorët tjerë janë paguar.
“Për shumicën e prindërve të Kosovës, mosdhënia e pagave nga Qeveria e Kosovës vetëm mësimdhënësve grevistë (ndërsa të punësuarit grevist në sektorët e tjerë i ka paguar) është vendim i kontestueshëm ligjërisht, i padrejtë dhe i dëmshëm në shumë dimensione. As kushtëzimi apo riemërtimi i dhënies së pagës nuk është aspak më i mirë, përkundrazi. Për habinë më të madhe as punëtorët teknikë, menaxhmentet e shkollave, mësimdhënëset lehona apo mësimëdhënësit që kanë mbajtur mësim nuk janë paguar. Pra një seri gabimesh, me pasoja juridike, në këtë vendim”, thuhet në njoftim.
Sipas Këshillit, megjithëse greva ishte e paarsyeshme nga Sindikata e Bashkuar e Arsimit, mospagesa e mësimdhënësve është përgjigjja institucionale më e padëshiruar edhe nga prindërit.
“Ndërsa greva ishte akt krejt i paarsyeshëm i SBASHK (dhe në momentin më të keq të mundshëm), mospagesa e mësimdhënësve (së paku jo në afatin ligjor dhe më dëmet juridike të shumëfishta tashmë të realizuara) është përgjigjja institucionale më e padëshiruar edhe nga prindërit”, thuhet në postim.
Po ashtu, Këshilli thotë se janë stërlodhur me gjendjen e pashpresë të përmirësimit në sistemin arsimor publik në Kosovë dhe se presin normalitet, zhvillim e cilësi në arsim.
Tutje, nga ky Këshill thuhet se solidariteti i tyre me mësimdhënësit për pagat është i plotë dhe i pakushtëzuar./teve1.info/
