Sipas tyre, përfaqësuesit e SBASHK-ut duhet ta pyesin njëri tjetrin se “a ia ka vlejtur” greva, shkruan teve1.info
KPK-ja ndër të tjera ka thënë se me grevën u kanë prishur kujtimet shumë nxënësve që do të fillonin rrugëtimin shkollor.
“Më 31 gusht përfaqësues të Këshillit të Prindërve të Kosovës kishim zhvilluar takim me drejtuesit e SBASHK-ut. Dy kërkesa i kishim: 1) Festa e 1 Shtatorit mos t’iu prishët nxënësve sepse për klasën e parë (sidomos) është kujtim jetësor e domethënës për gjithë vitin shkollor, dhe 2) Që SBASHK-u mos të hyjë në grevë të plotë e të paafat, se kjo masë është shumë ekstreme dhe e padrejtë ndaj fëmijëve por e dëmshme edhe për vetë SBASHK-un.Kërkesën e parë na e patën refuzuar pa iu dridhur qerpiku. Për të dytën na thanë “nuk kemi nevojë për këshilla se si bëhet veprimi sindikal – e dimë fort mirë këtë” (!)”, thuhet në reagimin e tyre në Facebook.
Të njëtit kanë thënë se anëtarët e sindikatës duhet ta pyesin veten se a janë krenarë për gjendjen që kanë krijuar.
“E sot, pas pesë javësh greve, drejtuesit e SBASHK-ut, por edhe anëtarët e sindikatës, e kanë për përgjegjësi, së paku njerëzore, ta pyesin vetën e njëri-tjetrin: a ia ka vlejtur dhe a mund të ndjehen krenarë me grevën?”, thuhet në njoftim.
Kreu i Këshillit Grevist të BSPK-së, Rrahman Jasharaj ka njoftuar sot se greva nuk është mbyllur, por po pezullohet deri në janar të vitit 2023. Jasharaj ka uruar që kjo kohë të shfrytëzohet nga Qeveria e të mos ndodhin greva si kjo e tanishmja, pasi sipas tij, janari i vitit 2023 vjen shpejt. /Teve1.info/
