Pas 14 vitesh, Serbia synon kthimin e shërbimit të detyrueshëm ushtarak.
Por deputeti i vetëm shqiptar në parlamentin e Serbisë, Shaip Kamberi po kërkon që të formohet një komision hetues për vrasjen e shqiptarëve në vitet e 80-ta.
Kamberi përmendi rastin e humbjes së jetës të 135 ushtarëve shqiptarë në radhët e Armatës Popullore të Jugosllavisë, vdekje që thotë se u raportuan si të dyshimta.
“Shumë nga këto raste, të regjistruara si “vetëvrasje”, “aksidente” apo “shkelje disiplinore”, u konsideruan të dyshimta nga familjet e viktimave, të cilat shpesh raportuan shenja dhune mbi trupat e kthyer. Mungesa e hetimeve të pavarura dhe transparencës ka forcuar bindjen se kemi të bëjmë me vrasje me motive etnike dhe politike, në një periudhë kur shqiptarët në APJ përballeshin me diskriminim, stigmatizim dhe armiqësi të hapur. Prandaj, është koha që Kuvendi të marrë përgjegjësi dhe të krijojë një Komision të posaçëm, i cili, përveç deputetëve, do të përfshinte edhe përfaqësues të shoqërisë civile dhe të komunitetit shqiptar, për një proces të drejtë, transparent dhe gjithëpërfshirës”, ka thënë Kamberi.
Këtë nismë e ka përshëndetur edhe Ragmi Mustafi, këshilltar i zëvendës-kryeministrit në detyrë, Besnik Bislimi.
Mustafi thotë se Serbia duhet të ballafaqohet më drejtësinë.
Por profesori Nexhmedin Spahiu është pesimist se do të mundësohet formimi i një komisioni të tillë.
Shërbimi ushtarak i detyrueshëm në Serbi është hequr më 1 janar të vitit 2011-të. Prej atëherë, ushtrisë njerëzit iu kanë bashkuar vetëm vullnetarisht.
