Të dielën Raportuesja për Kosovën në Parlamentin Evropian, Viola von Cramon, kërkoi nga Bashkimi Evropian që ta trajtojë më seriozisht çështjen e pasivizimit të adresave në Luginë.
Një kërkesë për më shumë vëmendje ndaj shqiptarëve në Serbi erdhi edhe të hënën.
Dy senatorët amerikanë, Joni Ernst dhe Gary Peters, i janë drejtuar me letër sekretarit amerikan të Shtetit, Antony Blinken, duke i kërkuar vëmendje për diskriminim dhe shtypjen që po u bëhet shqiptarëve në Luginën e Preshevës.
E kjo letër sipas këshilltares politike të Luginës së Preshevës, Ardita Sinani është rezultat i takimeve që kanë pasur përfaqësuesit e shqiptarëve në SHBA.
Më tej Sinani ka theksuar që përfshirja e shqiptarëve në dialog me Serbinë është e drejtë elementare njëjtë sikurse përfshirja e serbëve të Kosovës.
Nga ana tjetër, këshilltari për media i zëvendëskryeministrit Bislimi, Klisman Kadiu thotë se tash e dy vite ekzekutivi ka treguar përkushtim për të drejtat e shqiptarëve.
Sipas tij, ata janë pjesë edhe e marrëveshjes bazike.
“Sa i përket dialogut, iu kujtoj një paragraf nga preambula e Marrëveshjes Bazike që thotë: “Të vetëdijshëm se paprekshmëria e kufijve e respektimi i integritetit dhe sovranitetit territorial dhe mbrojtja e pakicave kombëtare janë kusht themelor për paqen.” Prandaj ne do të insistojmë në mbrojtjen e pakicës kombëtare shqiptare në Serbi e cila vazhdon të diskriminohet sistematikisht dhe një alarm të tillë tash së fundi e kanë lëshuar edhe senatorët amerikanë Gary Peters e Joni Ernst në letrën e fundit drejtuar sekretarit të Shtetit, Blinken”, ka deklaruar Klisman Kadiu, këshilltar për media i zëvendëskryeministrit të Kosovës.
Çështja e shqiptarëve të Luginës së Preshevës po diskutohet vetëm dy ditë para takimit në Bruksel në mes të kryeministrit të Kosovës, Albin Kurti dhe presidentit serb, Aleksander Vuciq në ndërmjetësimin e Bashkimit Evropian.
Autore: Fetije Kamberi
