Vendosja e këtyre barrikadave në katër komunat veriore në vitin 2022 po hetohet nga Prokuroria Speciale e Kosovës.
Organizimi i vendosjes së kësaj makinerie të rëndë nëpër rrugët veriore po dyshohet që u bë nga ish kryetari i Listës Serbe në atë kohë, Goran Rakiq, tashmë deputet i Kuvendit të Serbisë.
Sipas PSRK-së, Rakiq dyshohet për veprat penale: pengim i personit zyrtar në kryerjen e detyrave zyrtare, thirrje për rezistencë dhe bashkimi për veprimtari kundërkushtetuese.
Kjo prokurori e ka thirrur për këtë çështje hetimore, tri herë Rakiqin për intervistë, por i njëjti nuk është paraqitur.
Andaj, ka parashtruar kërkesë në Gjykatën Themelore të Prishtinës për lëshimin e urdhër-arrestit ndaj tij.
Arbnora Luta zyrtare për komunikim në Prokurorinë Speciale, thotë se për këtë rast janë intervistuar, edhe zyrtarë të lartë aktual në Listën Serbe.
“Tashmë ka përfunduar intervistimi edhe i të pandehurve S.S, I.S., dhe Z.E. Ndërsa, sa i përket intervistimit të G.R., i njëjti është ftuar tri herë, por nuk është paraqitur, fillimisht duke arsyetuar mungesën me probleme shëndetësore, ndërsa për dy ftesat e tjera nuk ka dhënë ndonjë arsyetim. Andaj, me qëllim të sigurimit të prezencës së G.R, Prokuroria Speciale e Republikës së Kosovës ka parashtruar kërkesë në Gjykatën Themelore të Prishtinës për lëshimin e urdhër-arrestit ndaj tij”, ka thënë ajo.
Tëvë1 mëson ekskluzivisht nga burime mirë të informuara se Goran Rakiq aktualisht ndodhet në Serbi.
E vendndodhja e Rakiqit, e pamundëson hetimin atje.
Pasi, sipas avokatit, Ardian Bajraktari, Serbia nuk ka bashkëpunim juridik me Kosovës për të sjellë para drejtësisë, Rakiqin.
“Është detyrë e Policisë pastaj për ta ekzekutuar të njëjtën në rast se ai eventualisht do të haset brenda territorit të Kosovës, do të arrestohet dhe të sillet para organeve të drejtësisë. Mirëpo kur kemi të bëjmë me raste të tilla në jo pak raste ka rezultuar të njëjtit mund ta shfrytëzojnë fqinjin tonë veriorë i cili nuk ka vullnet për të bashkëpunuar me organet tona, pastaj vjen në shprehje çështja e bashkëpunimit juridik ndërkombëtar”, është shprehur Bajraktari
Sipas tij, për veprat penale që ngarkohet Goran Rakiq nga Lista Serbe dhe11 personat e tjerë, gjykimi në mungesë nuk mund të zhvillohet.
“Aktualisht është në fazën hetimore në lidhje me personin mbetët të shihet se si do të shkon procedura ndaj tyre, për faktin se është e rëndësishme të konstatohet që për këtë kategori të veprave penale, procedura nuk mund të zhvillohet pa qenë ata për tu ballafaquar me akuza, pra gjykimi në mungesë për këtë kategori të veprave penale nuk mund të zhvillohet”, ka treguar Bajraktari.
Deri më tani, Prokuroria Speciale ka intervistuar, kryetarin aktual të Listës Serbe, Zllatan Elek, dhe dy deputetët e kuvendit, Sllavko Simiq dhe Igor Simiq.
Prokuroria Speciale ka kërkuar urdhërarrest edhe ndaj 11 personave të tjerë.
