Liberalizimi i vizave pritet të ketë pasoja në ekonominë e vendit. Kjo pasi sipas Aleancës Kosovare të Bizneseve mbi 150 mijë qytetarë konsiderohet se do të lëshojnë vendin. E për këtë nga Oda Ekonomike presin nga qeveria të krijojë një strategji për ndalimin e ikjeve nga Kosova.
Njoftimet e kërkesave për punëtorë pritet të shpeshtohen pas 1 janarit 2024.
Tregu në Kosovë po konsiderohet se do të ketë nevojë për punëtorë për shkak të ikjes së qytetarëve nga vendi si shkak i liberalizimit të vizave.
Sipas Aleancës Kosovare të Bizneseve, rreth 150 mijë qytetarë do të largohen që në vitin e parë nga Kosova.
“Në bazë të një hulumtim që e kemi bërë rreth 150 mijë qytetarë do të ikin në vitin e parë e ky numër mund të jetë edhe më i madh, kryesisht fuqi punëtore, profesion të ndryshme”, tha kryetari i Aleancës Kosovare të Bizneseve, Agim Shahini.
Por largim të qytetarëve nga Kosova drejt vendeve evropiane, nuk po pret kryetari i Odës Ekonomike, Lulëzim Rafuna.
“Në nuk presim të ketë largime masive të te rinjve, për arsyeje që ne jemi dëshmuar që në vitet e fundit ka pasur largime, pritjet tona janë se do të respektohen rregullat, se kjo është një vizë turistike”, u shpreh kryetari i odës Ekonomike të Kosovës, Lulzim Rafuna.
Megjithatë Rafuna kërkon që qeveria të krijojë një strategji që do të ndalojë ikjen e qytetarëve.
“Do të ishte subvencionimin e bizneseve, start-up, ndihmës në sektorë, të identifikohen se cilët sektor janë më fitme prurës për shtetin, dhe qeveria të subvencionojë dhe të ndihmojë përmes politikave fiskale”, tha Rafuna.
Në anën tjetër mundësia e kosovarëve për të lëvizë lirshëm në zonën shengen pritet të këtë edhe pasoja pozitive për bizneset vendore.
“E mirë është se bizneset e Kosovës mund të planifikojnë për te ecë drejte tregut Evropian për të gjetur partnerë të rinj. Se në bazë të një hulumtimi që kemi rreth 70% e bizneseve nuk kanë treg në Evropian,sepse nuk kanë mundësi takimi fizik”, deklaroi kryetari i Aleancës Kosovare të Bizneseve, Agim Shahini.
Prej datës 1 janar të vitit të ardhshëm qytetarët kosovarë do të mund të udhëtojnë në shtetet e zonës shengen, për 90 ditë në çdo periudhë 180-ditore.
