Nënshkrimet e shumëpërmendura u deponuan.
Afër 160 të tilla u dorëzuan këtë të mërkurë në sekretariatin e Lidhjes Demokratike të Kosovës, për thirrjen e Kuvendit të jashtëzakonshëm të partisë.
Iniciativa u nis me kërkesën për shkarkimin e Lumir Abdixhikut nga posti i kryetarit.
Këto nënshkrime u depozituan nga deputeti i zgjedhur i LDK-së, Armend Zemaj, bashkë me Florian Dushin, kryetar i degës së dytë të LDK-së në Prishtinë.
Të kontaktuar gjatë ditës nga tëvë1, asnjë nga ta nuk qenë të qasshëm për këtë çështje.
Një nga anëtarët e kësaj partie që dha nënshkrimin ishte edhe Gzim Plakolli, dega e LDK-së në Mitrovicë.
“Po unë personalisht e kam nënshkruar. Drejtohuni Armend Zemajt sepse ai ka qenë personi i cili është marrë me këtë çështje dhe ai iu jep informatën sa nënshkrime janë mbledhë edhe kur janë dorëzu, sa janë mbledhë. Unë në emër të Degës mundem me fol personalisht sepse delegatët e kanë pasë lirinë e vet për me vendosë, në emër të Degës nuk është bë sepse këtu është çështje besimin secili delegatë me vendosë mbi vlerësimet e veta a me nënshkru apo jo”, u shpreh Pakolli.
Në një deklarim për media, më vonë doli edhe në nënkryetari i partisë, Lutfi Haziri.
Ai tha se do të punohet në shqyrtimin e kërkesës.
“Unë mendoj se do të vazhdohet të punohet në dy binarë: binari i parë është shqyrtimi i kërkesës së nënshkruesve, të cilët janë delegatë dhe përfaqësues të elektoratit të LDK-së. Binari i dytë është kryetari i LDK-së dhe zyra e tij, me autorizime të plota për t’i menaxhuar këto procese politike sipas kërkesës. Kërkesa është procedurale, prandaj në rrugë procedurale edhe do të trajtohet. Ndërsa ato çështje që janë politike, do t’i trajtojmë politikisht dhe bashkërisht”, u shpreh Haziri.
Gjithë këto zhvillime për brenda LDK-së, po i sheh të papranueshme ish deputeti i kësaj partie, Rexhep Osmani.
“Është një sindromë e ndarjes së kësaj partie, e pjesëtimit të partisë, partia nuk duhet të pjestohet, por duhet të shumëzohet dhe dyshimet e mia janë se ka edhe grupe paramilitare politike që bëjnë rolin e dreqit, dikujt tjetër që ta quajë kështu”, ka thënë Osmani.
Gjatë ditës, ka reaguar edhe deputeti i LDK-së, Avdullah Hoti i cili ka thënë “Askush nuk është mbi LDK-në dhe anëtarësinë e saj”.
Këto nënshkrime u shfaqën në shenjë pakënaqësie ndaj Abdixhikut, pasi LDK doli sërish e treta në zgjedhjet e 7 qershorit.
