Kështu për të ndihmuar në arritjen e marrëveshjeve, superfuqia globale ka emëruar përfaqësues specialë për Ballkanin Perëndimor.
Madje ish-presidenti Donald Trump në shtator të vitit 2020 ishte personalisht nikoqir i përfaqësuesve të të dyja vendeve, të cilët nënshkruan një marrëveshje për normalizim ekonomik.
E të martën pas një takimi me kryeministrin Kurti, lideri i AAK-së, Ramush Haradinaj tha se tash është koha që portofoli i dialogut t’i kalojë presidentit amerikan Biden.
Profesori i Integrimeve Evropiane, Avni Mazreku thotë se roli i ShBA-së në proces të dialogut duhet të jetë kyç nëse kërkohet njohje nga Serbia. Megjithatë ai sheh një problem që ShBA-ja ta marrë ndërmjetësimin e procesit.
“Bashkimi Evropian as nuk e kërkon, as nuk e ka kërku kurrë e as nuk do ta kërkojë njohjen e Kosovës nga ana e Serbisë për shkak se vet BE nuk e njeh statusin e Kosovës si shtet i pavarur. Prandaj kjo është një ambicie imagjinare. Roli i ShBA-së ka qenë dhe vazhdon të jetë recidiv në dialog. Por unë jam skeptik që pala tjetër do ta pranoj ShBA si palë ndërmjetësuese në dialog. Ose do t’i pranoj me kushtin që edhe Rusia të jetë pjesë e dialogut”, tha ai.
Rritje të rolit të ShBA-së në dialog kërkon edhe njohësi tjetër i integrimeve, Agron Hoti.
“Kur e dimë që Bashkimi Evropian që nga 2011 e tutje është futur në një krizë të thellë, është vështirësuar vendimmarrja, demokracitë kanë filluar të bien, kriza financiare, euro-kriza të gjitha këto kanë bërë që Bashkimi Evropian vetëm të na mbajë të lidhur për dialog dhe asgjë konkrete në rrafshin e marrëveshjeve. Prandaj pa një përfshirje direkte të Shtëpisë së Bardhë, jam i bindur se ne do të vazhdojmë me dialog ashtu si kemi vazhduar për 11 vite”, deklaroi Hoti.
Ditë më parë, zëdhënësi i Shtëpisë së Bardhë Ned Price tha se sekretari i shtetit Anthony Blinken është i gatshëm të përfshihet personalisht në dialog nëse është nevoja.
Kronika e gazetarit Gojart Jashari.
