Janë vazhdimisht në terren për të ofruar siguri dhe rend për të gjithë qytetarët e vendit.
Pjesëtarët e Policisë së Kosovës, por veçanërisht ata të Njësive Speciale kanë vazhdimisht operacione të ndryshme më delikate.
Tëvë1 ka pasur biseda me disa prej tyre të cilët kanë deklaruar se shpeshherë pas aksioneve, për shkak të natyrës së punës iu nënshtrohen trajtimit tek psikologët në baza individuale.
Televizioni ka kërkuar informacione nga Policia e Kosovës se si është e rregulluar kjo çështje dhe se a iu nënshtrohen kontrolleve të vazhdueshme këta efektivë, mirëpo përgjigje nuk ka pasur.
Psikologu, Arbër Zeka tregon se një gjë e tillë është e domosdoshme për këta zyrtarë, për shkak edhe të natyrës së punës që ata e bëjnë.
“Është e domosdoshme sepse niveli i lartë i stresit jo që e shkakton unifrioma por përgjegjësia që ata e kanë ajo i detyron që me pasë nevojë për shkak të stresit të lartë edhe situatave tramautike të cilat munden me iu ekspozu e kanë shumë të nevojshme që me pasë mbështetje të vazhdueshme psikologjike… Kur ti përballesh me rrezik për jetën, kur ti përballesh me kriminelët kushtimisht të cilët thejnë rregulla të caktuara ti ekspozohesh traumave dhe përderisa ke ekspozuar traumave ti e ke të patjetër me i trajtu këto”, ka deklaruar ai.
Sipas tij, problematikë është se ende nuk ka një vetëdijësim të mjaftueshëm për trajtim psikologjik dhe se duhet bërë punë në këtë drejtim.
“Ndoshta duhet punuar më shumë që me i përgatit këta njerëz sidomos njerëzit që punojnë në uniform sikur në këtë rast Policia dhe Ushtria që ata me qenë të gatshëm për ankthet e tyre që paraqiten, për stresin e lartë që e kanë në punë edhe najherë për ato makthet e natës që munden me u paraqit si rezultat i punës që ata e bëjnë. Duhet pasur parasysh se ata duhet me qenë të gatshëm me kërku ndihmën e shëndetit mendor ashtu siç janë të gatshëm ndonjëherë me marrë ndihmë në aspektin mjekësor organike”, ka pohuar ai.
Edhe nënkoloneli në pension, Refki Morina vlerëson se kontrolle të tilla psikologjike duhet të jenë të vazhdueshme për shkak se ata duhet të jenë të përgatitur për çdo situatë.
“Vazhdimisht duhet të ketë kontrolla psikologjike, psiqike, analiza të tyre dmth për arsye se kemi të bëjmë me zyrtarë policorë që janë të armatosur prandaj duhet të kemi të bëjmë me njerëz të cilët duhet të jenë të shëndoshë edhe psiqikisht edhe fizikisht edhe të tjera. Prandaj gjithë këto përcillen nga eprorët e tyre edhe një pamje jo e mirë e një zyrtari policor menjëherë eprori duhet të ndikojë që ai të shkojë të kontrollohet”, tha ai.
Sipas burimeve të Tëvë1, gjatë javës së kaluar të gjithë pjesëtarët e njësive speciale i janë nënshtruar kontrolleve psikologjike.
