Përmes një reagimi, nga kjo organizatë ka dënuar veprimet e tilla përjashtuese dhe diskriminuese të pjesëtarëve të komuniteteve rom, shkali dhe egjiptian.
“Rasti i fundit, më datë: 17 maj 2022, ku 10 fëmijë nga komunitetet rom, ashkali dhe egjiptian nga komuna e Pejës u mblodhën në ‘Festën e Shkronjave të Abetarës’, doli të jetë segregues e diskriminues ndaj tyre. Kështu duke u cenuar të drejtën të festonin bashkë me fëmijët e tjerë. Ngjarje kjo e cila ndodhi pikërisht në praninë e përfaqësuesve të institucioneve Qëndrore e Lokale si: Ministria e Arsimit, Shkencës, Teknologjisë dhe Inovacionit dhe Komunës së Pejës. OJQ Voice of Roma, Ashkali and Egyptians’ dënon ashpër veprimet e tilla përjashtuese dhe diskriminuese të pjesëtarëve të komuniteteve rom, ashkali dhe egjiptian në secilën formë segreguese, e sidomos kur kemi të bëjmë me fëmijë, si kategori më e ndjeshme e shoqërisë sonë”, thuhet në reagim.
Sipas tyre, veprimet nga MASHTI dhe Drejtoria Komunale e Arsimit në Pejë duhen të jenë urgjente dhe efikase në marrjen e masave adekuate ndaj rasteve të tilla që kanë ndikim negativ te këto komunitete.
“Veprimet nga MASHTI dhe Drejtoria Komunale e Arsimit në Pejë, duhen të jenë urgjente dhe efikase në marrjen e masave adekute ndaj rasteve të tilla që kanë ndikim negativ tek këto komunitete dhe shoqëria në përgjithësi. Është shumë e rëndësishme që përveç se të reagojmë në një ditë si kjo dhe ditët e tjera të kalohen në heshtje, në fakt çdo ditë do të duhej që institucionet e Republikës së Kosovës të punojnë fuqishëm në parandalimin e rasteve të tilla segreguese dhe të punojnë në aspektin e ndërgjegjësimit të shoqërisë sonë. Andaj kërkojmë përgjegjësi institucionale dhe marrjen e masave adekuate për rastin në fjalë”, thuhet më tej në reagim. /teve1.info/
