Prokuroria Speciale e Kosovës ka kërkuar caktimin e masës së paraburgimit ndaj shtatë personave të dyshuar për vepra të rënda korrupsioni, të cilët u arrestuan një ditë më parë.
Sipas Prokurorisë, ekziston dyshimi i bazuar se të pandehurit, duke vepruar në bashkëkryerje dhe në vazhdimësi, i kanë shkaktuar buxhetit të shtetit dëm financiar që dyshohet të jetë në vlera milionëshe, përmes veprimeve të kundërligjshme me qëllim përfitimi personal.
Në njoftimin zyrtar thuhet se njëri nga të dyshuarit, M.D., në emër të F.I., ka paraqitur në mënyrë të kundërligjshme propozim-ankesë për ndryshim të një vendimi përfundimtar për shpronësim, ndonëse afati ligjor kishte skaduar për më shumë se tetë vjet. Pavarësisht kësaj, i dyshuari J.M., si dhe Qeveria e Kosovës e përfaqësuar nga Avokatura Shtetërore, nuk e kanë kundërshtuar këtë shkelje procedurale, duke mundësuar që rasti të përfundojë me marrëveshje gjyqësore, sikurse edhe disa raste të tjera të ngjashme.
Si pasojë e këtyre veprimeve, vetëm në një rast është shkaktuar dëm mbi 220 mijë euro ndaj buxhetit të shtetit, ndërsa dëmi i përgjithshëm ende nuk është përcaktuar, por dyshohet të jetë shumë më i madh.
Prokuroria Speciale ka bërë të ditur se të pandehurit dyshohen për kryerjen e veprave penale: keqpërdorim i pozitës apo autoritetit zyrtar, marrje dhe dhënie ryshfeti, ushtrim i ndikimit si dhe deklarim i rremë.
