Prokuroria Themelore në Ferizaj ka kërkuar nga Gjykata Themelore caktimin e masës së paraburgimit ndaj 24-vjeçares me inicialet A.R., e dyshuar për veprën penale “Vrasja”.
Sipas njoftimit të Prokurorisë, ekziston dyshimi i bazuar se më 28 qershor 2026, rreth orës 22:40, në rrugën “Sejdi Sejdiu” në Ferizaj, pas një mosmarrëveshjeje dhe përleshjeje fizike, e dyshuara ka privuar nga jeta viktimën me inicialet F.H.
“Prokuroria Themelore në Ferizaj njofton opinionin publik se ka kërkuar nga Gjykata Themelore në Ferizaj caktimin e masës së paraburgimit ndaj të pandehurës A.R., për shkak të dyshimit të bazuar për kryerjen e veprës penale ‘Vrasja’, sipas nenit 172 të Kodit Penal të Republikës së Kosovës”, thuhet në njoftim.
Prokuroria bëri të ditur se personi tjetër i dyshuar, me inicialet M.B., i cili ishte ndaluar për sqarimin e plotë të rrethanave dhe përfshirjes së tij në rast, është liruar me aktvendim të Prokurorit të Shtetit, pasi nuk është konstatuar bazë për vazhdimin e ndalimit të tij.
Ndërkohë, lëndime trupore ka pësuar edhe e dyshuara A.R., për të cilat Prokuroria thotë se dyshohet t’i jenë shkaktuar nga viktima, tashmë i ndjeri F.H.. Ajo ka marrë trajtim mjekësor në Qendrën Klinike Universitare të Kosovës (QKUK).
Hetimet lidhur me rastin janë duke vazhduar.
