Gjatë së dielës njëri nga pjesëtarët e bandës së armatosur në veri, pas plagosjes mori trajtim në Klinikën Ortopedike.
E rastet e ngjajshme të trajtimit të personave të dyshuar për krime në të njëjtën klinikë me pacientë të tjerë po vlerësohen si jo të qëlluara.
Njohës të fushës së shëndetësisë dhe sigurisë konsiderojnë se është i nevojshëm një mini-burg brenda hapësirave të QKUK-së.
“Nuk e di sa do ishte e mundur kjo nga kapacitetet e QKUK-së, mirëpo do të ishte një ide e mire për faktin që të mos trajtohen në të njëjtat hapesira me pacientët e tjerë në mënyrë që trajtimi i pacientëve që nuk janë të burgosur të mos pengohet në çfarëdo forme qoftë prej forcave policore që i ruajnë të burgosurit ose të mos ndihen nën presion, ose të mos ndihen se mund të cenohet siguria e tyre. Kjo do të ishte arsyeja pse mini- burgu do të ishte ide e mire”, thotë njohësi i fushës së Shëndetësisë, Bujar Vitia.
Të njëjtin mendim e ndajnë edhe nga Shoqata e pacientëve.
“Thuajse në të gjitha rastet ka mundësi që një pacient që ka kry vepër penale të trajtohet veqmas, megjithatë ai duhet të ndajë hapësirat e përbashkëta me pacientët e tjerë, duhet të ndajë korridoret, banjot dhe kështu që pacientët të mos ndihen të pasigurt në institucionet shëndetësore, pra duhet të ketë hapsira të veçanta për ta”, theksoi Besim Kodra nga Shoqata e pacientëve.
Sipas njohësit të çështjeve të sigurisë, Bedri Elezi, nga kaosi që mund të shkaktohet nga aktivitetet policore për siguri ose nga prania e të burgosurëve, shpeshëherë shkaktohet edhe panik tek pacientët.
“Institucionet duhet të mendojnë që të kenë vende të posaçme ku do të i ofrohet ndihmë mjekësore edhe personave pavarësisht nëse të njëjtit akuzohen për vepra të rënda qofshin ato terroriste dhe jo të trajtohen në vende ku trajtohen qytetar të Republikës së Kosovës, për shkak rrezikut të ikjes si dhe për shkak të kaosit që mund të shkaktohet si rezulttat i aktiviteteve policore për të sigururar siguri dhe për të garantuar se i njëjti nuk mund të largohet pa u ballafaquar me drejtësinë”, bën të ditur Elezi.
Lidhur me këtë çështje, ekipi i Tëvë1 ka tentuar të marrë përgjigjje edhe nga ShSKUK-ja dhe Shërbimi Korrektues i Kosovës, mirëpo asnjëri prej këtyre institucioneve nuk ka treguar gatishmëri për t’iu përgjigjur interesimit të televizionit.
