Pothuajse çdo ditë në duar ka nga një qese me barna.
Por, këto ilaçe nuk i ka për vete.
Fedaije Maçastena, nga Prapashtica e Prishtinës përveç kushteve të vështira, tash e 5 muaj po përballet edhe me sëmundjen e burrit të saj 46 vjeçar.
“Shtëpinë ma ka ndërtu dikush më nuk kam nevojë për shtëpi, por burrin e kam shumë sëmurë. Dy tri herë është operu por nuk është mirë. Nuk po mundem me ia dalë me ilaçe me i ble 55 euro një kanellë me dy pjesë, barna çdo ditë, 100 euro qysh i mora, 40 euro vetëm serumi, plus tjera ilaçe, çdo dy ditë nga një euro për mu janë shumë”, thotë Maçastena.
Për shkak të mungesës së parave, ka raste që i shoqi mbetet pa barna.
“Terapia shumë e shtrenjtë, 400 euro 6 infuzione, ilaci 40 euro, për çdo ditë kanella 55 euro, pa këtë ka qëndruar dy javë ditë e që nuk guxon me ndërpre deri të thotë mjeku por skam pas me ia ble deri ka dalë pensioni, e ku me dërgu unë atë pension, a me i jep fëmijëve për shkollë, me pagu rrymë, ilaçe burrit e tjerat ku janë”, tregon bashkëshortja e 46-vjeçarit.
Maçastena ka 3 fëmijë që vijojnë mësimin në shkollën fillore “Zenel Hajdini” në Prishtinë.
Por kërkesat e tyre nuk ia del t’ia plotësoj .
“3 fëmijët në shkollë, unë me 100 euro nuk po mundem me ia dalë, tre fëmijët i kam pa duksa që ja ka kërkuar shkolla nuk po kanë, nuk po kam mundësi me ua ble”, shprehet ajo.
Ajo qëndron në këtë shtëpi deri sa shtëpia e saj në fshatin Prapashticë të Prishtinës të përfundoi.
Kërkesa e saj e vetme është që të ndihmohet me të holla vetëm për ilaçet e burrit të saj.
