Të enjten, presidenti serb, Aleksandër Vuçiq deklaroi se nuk beson që do të ketë sanksione ndaj qytetarëve të shtetit të tij, por që nëse ato aplikohen, do të jenë ndaj tij.
Madje, ai gjatë një interviste u bëri thirrje përfaqësuesve të serbëve në Kosovë që të organizojnë sa më parë zgjedhje për kryetar të komunave veriore.
Për këtë çështje, kryetari i Listës Serbe, Goran Rakiq tha të premten se janë të gatshëm të marrin pjesë në zgjedhjet e reja komunale në veri dhe se këtë vendim e morën bashkarisht me Vuçiqin.
“Më duhet të them se duhet të jemi të bashkuar dhe në këto kushte të pamundura të përpiqemi të jemi krijues të fatit tonë dhe të mbrojmë njerëzit. Gjithmonë kemi marrë vendime politike në interes të qytetarëve, duke mos parë nëse ata po nxjerrin pikë politike”, tha Goran Rakiq, kryetar i Listës Serbe.
Më pas, deklaratën e presidentit serb e komentuan njohësit e rrethanave politike.
Politiologu Fidan Ukaj vlerëson se përmes kësaj kërkese, Vuçiq po tenton që pushtetin e humbur që e kishte nga Radoiçiq në veri, ta mbajë ende përmes këtij subjekti politik.
Njohësi i çështjeve politike Albinot Maloku thotë se më këto kërkesa, shteti i Serbisë po tenton t’i ikë përgjegjësisë për sulmin terrorist që ndodhi në Banjskë të Zveçanit.
Kosova u zotua para faktorit ndërkombëtar për riorganizimin e zgjedhjeve në veri, por që këtë dëshiron ta bëjë vetëm përmes një udhëzimi administrativ i cili ua mundëson qytetarëve t’i shkarkojnë kryetarët përmes një peticioni.
