Kryeprokurori i Gjykatës Ndërkombëtare Penale (GJNP), Karim Khan, është paralajmëruar se nëse urdhër-arrestet për kryeministrin izraelit Benjamin Netanyahu dhe ish-ministrin e Mbrojtjes Yoav Gallant nuk tërhiqen, ai dhe GJNP do të “shkatërrohen”, raporton Middle East Eye (MEE).
Paralajmërimi iu dha Khan në maj nga Nicholas Kaufman, një avokat mbrojtës britaniko-izraelit në gjykatë i lidhur me një këshilltar të Netanyahut, i cili tha se këshilltari ligjor i udhëheqësit izraelit i tha atij se ishte “i autorizuar” t’i bënte Khan një propozim që do t’i lejonte atij të “zbriste nga pema”, tha faqja e internetit e lajmeve.
Sipas një shënimi të takimit të ruajtur në GJPN dhe të parë nga MEE, Kaufman i tha Khan-it të aplikonte në gjykatë për të riklasifikuar urdhër-arrestet dhe informacionin bazë si “konfidencial”.
Kjo, u sugjerua, do t’i lejonte Izraelit të kishte akses në detajet e akuzave, gjë që nuk mund ta bënte në atë kohë, dhe t’i kundërshtonte ato privatisht – pa u bërë publik rezultati.
Kaufman e paralajmëroi Khan-in se nëse do të dilte në pah se ai po kërkonte më shumë urdhër-arreste për ministrat e ekstremit të djathtë, Itamar Ben-Gvir dhe Bezalel Smotrich, për shkak të promovimit të tyre të vendbanimeve të paligjshme izraelite në Bregun Perëndimor të pushtuar, atëherë “të gjitha opsionet do të hiqeshin nga tavolina”.
Kaufman i tha Khanit: “Ata do të të shkatërrojnë ty dhe do ta shkatërrojnë gjykatën.”
Gjykata Penale Ndërkombëtare lëshoi urdhër-arreste kundër Netanyahut, Gallant dhe udhëheqësit të Hamasit, Mohammed Deif, në nëntor, me akuzat për krime lufte dhe krime kundër njerëzimit për shkak të sulmeve të udhëhequra nga Hamasi ndaj Izraelit më 7 tetor 2023 dhe luftës gjenocidale të mëvonshme të Izraelit në Gaza. Që atëherë, Deif është konfirmuar i vdekur.
