Basketbollisti i Trepçës, amerikani Kenny Hasbrouck është vlerësuar për paraqitjen e tij të fundit kundër Bashkimit.
Trepça po avancon 3:0 në serinë finale të “play-offit”, ndërsa Hasbrouck ishte më i merituari për fitoren e tretë të ekipit nga Mitrovica.
Të dielën në Prizren, Trepça fitoi 84:80 ndaj Bashkimit kurse Hasbrouck është shpallur “MVP i Publikut”, një ditë pas ndeshjes.
Hasbrouck është zgjedhur lojtari më i mirë i ndeshjes nga ndjekësit në rrjetet sociale të Federatës së Basketbollit të Kosovës, ka bërë të ditur FBK të hënën.
Për gati 29 minuta lojë në parket, Hasbrouck ka pasur indeksin e lojës 22, duke e mbyllur ndeshjen me 22 pikë, 1 kërcim dhe 1 asistim.
Para Hasbrouckut, këtë çmim të publikut në këtë seri finale, e kanë fituar edhe Akili Vining e Mustapha Amzil, po ashtu të Trepçës.
Ndeshja e katërt ndërmjet Bashkimit dhe Trepçës, do të zhvillohet të mërkurën mbrëma në palestrën “Sezai Surroi” në Prizren.
