Këto janë lëndimet që i janë shkaktuar një 1-vjeçareje nga Lipjani.
Ndaj saj dyshohet se ka ushtruar dhunë një edukatore e kësaj çerdheje, paraditen e së hënës.
Nëna e 1-vjeçares që nuk ka dashur t’i zbulohet identiteti, tregon se kanë vërejtur edhe më herët shenja në fytyrë, por që nuk kanë menduar se është ushtruar dhunë.
“Mandej insistova me i pa kamerat në prani të mësueses dhe pronares, kamerat i kemi kqyrë bashkë, një herë dhuna që është shfaqë ndaj saj ka qenë me një top që e ka gjujtë teper me dhunë, pas pak sekondave e ka kapë qikën prej krevetit dhe e ka kapë për fyti dmth krejt thonjtë ia ka shti në fyt qashtu qysh shihet në foto vërehet me gjakë dhe e mavijosur dhe e ka përplasë për toke”, është shprehur nëna e 2 vjeçares.
Ajo shton se ky rast ka ndikuar negativisht edhe në shëndetin mendor të vajzës.
“Qikën e kemi çu menjëherë në Emergjencë në Lipjan, ia kemi bërë një kontrollë pastaj na kanë dhënë uhdëzimin për Prishtinë ia kemi bërë krejt rentgenet që u dashtë dhe tash ka mbetë me fol edhe me një psikolog sepse çika ka traumë tepër shumë, dje tërë natën veç ka qajtë ka marrë trauma, si prind kemi marrë trauma krejt familjarët e lëre më kjo që e ka përjetuar dhunën”, është shprehur tutje nëna e vajzës.
Ekipi i televizionit ishte sot te ky kopsht për të marrë një qëndrim lidhur me rastin, por që askush nga ta nuk ishte i qasshëm.
Derisa nga Policia kanë treguar se janë duke u marrë me rastin dhe se e dyshuara është liruar për në procedurë të rregullt.
“Dje rreth orës 15:00 në stacionin policor në Lipjan është iniciuar një rast lëndim trupor. Ankuesja dhe e dyshuara janë intervistuar. Rasti po trajtohet në procedurë të rregullt përkitazi me udhëzimet e prokurorit të shtetit”,kanë reagur nga policia e Kosovës.
Tëvë1 ka kërkuar përgjigje edhe nga Drejtoria e Arsimit, por që të njëjtit kanë thënë se nuk i kanë nën menaxhim çerdhet private.
