Këmbësorët në Prishtinë po e përshëndesin vendimin e komunës që rruga ‘’Xhorxh Bush’’ të shndërrohet në shesh. Mirëpo kjo po kundërshtohet nga shoferët dhe Vrojtuesit e Lagjes të cilët kanë bërë edhe thirrje për protestë që të hapet sërish kjo rrugë për qarkullim.
Këto blloqe po qëndrojnë këtu tash e ca muaj.
Edhe tabela pranë semaforëve në qendër të Prishtinës jep lajmërim të qartë.
Hapësirën pa vetura, në rrugën “Xhorxh Bush” qytetarët po e shfrytëzojnë çdo ditë.
Për shndërrimin e kësaj rruge në shesh, komuna së fundmi e tregoi edhe dizajnin.
E këmbësorët po e përshëndesin këtë veprim të qeverisjes lokale.
“Po shiqo kjo ka rëndësi të jashtëzakonshme për qytetarë, për këmbësorë. Ka vepru shumë mirë që e ka lënë shesh këtu, se ka hapësira tjera, ka mundësi për me u kthy kerret atje se me hi ksajde, pse me i rreziku qytetarët. Edhe tash nuk ka me pasë dendësi të madhe të komunikacionit këtu, rinia shkoi”, tha qytetari, Gani Haxhiaj.
“Pse mos me kon shesh, çka ka lidhje? Unë prej Veternikut vij me kerr me pi një kafe. Autobusi është 50 cent, a 10 euro i harxhon benzinë, pse mos me kon? Unë deri në Veternik e kisha propozu me kon shesh. Jashtë si vijnë janë parkingjet, pse me hy në qytet, pse me bo tollovi, për çka, çfarë arsye? Kur kem mundësi na me dalë me shetitë m’u kënaqë”, tha qytetari, Shaban Nikçi.
Edhe për mërgimtarët është i mirë se ardhur vendimi për rrugën “Xhorxh Bush”.
“Unë kisha mendue ma mirë qashtu me konë, edhe politikanëve këtu u kisha thanë mos e prishni se shesh i bukur, edhe na gurbetqarët kur të vijmë jemi të kënaqur”, u shpreh qytetari Valon Xharra.
E për banorë të tjerë, ngarkesa vjen nga mungesa e nënkalimit në kryeqytet.
“Neve po na pëlqen shumë, tamam po i ka hije diqysh qytetit, pak ma qytet me u dukë. A po dojmë me shku në Europë? Epo ndryshe qysh? Po këtu ka probleme tjera, nëse ish çelë nënkalimi atëherë ish liru edhe komunikacioni edhe çdo gjë kish qenë më në rregull. Po derisa s’bëhet nënkalimi normal që do të ketë ngarkesa në rrugë”, u shpreh një banore.
Mirëpo për komunitetin e taksistëve, mbyllja e rrugës ‘’Xhorxh Bush’’ ka shkaktuar dëshpërim të madh.
“Unë prej 24 orëve, i kam diku 14 orë i kam qarkullim gjatë gjithë ditës edhe kjo e ka shkatërru këtë linjë për shkak se po bëhet gjatë ditës shumë kolonë e në veçanti në orët e pikut ku po bëhet një gjendje katastrofale në tërë rrugët”, tha taksisti, Gazi.
Ai ka një thirrje për kryetarin e kryeqytetit dhe të gjithë banorët.
“I bëj apel z, Rama me hapë rrugën dhe i bëj apel të gjithë qytetarëve që t’i bashkohen në këtë iniciativë që sado pak le të merr parasysh që nuk dmth që është kryetar edhe mundet me bo çka të don ai. Nëse ne e kemi votu, atëherë le t’i merr parasysh kërkesat tona sepse kjo është e tmerrshme. Me dalë me t’u shitë rakia e substanca narkotike n’pikë të ditës këtu edhe me nejt na gjithë ditën në kolona nuk ka sens, nuk ka logjikë definitivisht”, u shpreh taksisti.
Vrojtuesit e Lagjes në Prishtinë kanë bërë thirrje për protestë për të kërkuar hapjen e kësaj rruge.
Protesta pritet të mbahet me 14 janar në rrugën “Xhorxh Bush” në Prishtinë.
