Kurse, një tjetër marrëveshje e ka njoftuar presidenti serb, Aleksandër Vuçiq, sipas së cilit ka mbetur vetëm formalizimi i saj.
“Kemi pasur negociata me palën turke, me KEDS-in, për prezencën në veri të Kosovës. Për këtë jemi dakorduar. Shpresojmë se ka mbetur vetëm ana teknike që të rregullohet dhe do të kemi rezultate të mira në ditët në vijim”, tha ai.
E zëdhënësi i KEDS-it, nuk ka konfirmuar se një marrëveshje është e gatshme, vetëm se ajo do të sillte ndryshime pozitive.
“Çështja e energjisë elektrike në veri të vendit ka qenë subjekt i bisedimeve ndërmjet Kosovës dhe Serbisë që nga fillimi i dialogut. Çdo marrëveshje e arritur do ta ndryshonte situatën për mirë”, deklaroi ai.
Si pozitive në aspektin ekonomik, e vlerëson edhe njohësi i ekonomisë, Mustafë Kadrijaj një marrëveshje potenciale mes dy vendeve.
Shpenzimet e rrymës së shpenzuar nga serbët e veriut, deri më 2017 e kanë paguar banorët e Mitrovicës së Jugut, por një praktikë e tillë u pezullua nga Gjykata e Apelit, e cila më vonë u konfirmua edhe nga Gjykata Kushtetuese.
Aktualisht, rrymën që e shpenzojnë banorët e pjesës veriore e paguan Qeveria e Kosovës, përmes KOSTT.
Kronika nga Florijeta Dernjani.