Instituti Demokratik I Kosovës përmes një reagimi në Facebook ka thënë se konstiutimi i Kuvendit duhet të përmbyllet më së voni deri nesër, duke përfshirë zgjedhjen e Kryetarit dhe të pesë nënkryetarëve të kuvendit.
“Ndërprerja e sotme e seancës, përderisa afati kushtetues ende nuk ka përfunduar, nuk përbën në vetvete shkelje të afatit apo procedurave të parapara me Rregullore. Megjithatë, në përputhje me aktgjykimet e Gjykatës Kushtetuese të vitit të kaluar, rikujtojmë që seanca konstituive duhet të përmbyllet më së voni deri nesër, duke përfshirë zgjedhjen e Kryetarit dhe të pesë nënkryetarëve të Kuvendit “, thuhet në reagimin e KDI-së.
Tutje,në reagim thuhet se afati i ditës së nesërme është afati për konstituimin e Kuvendit dhe jo për arritjen e marrëveshjes.
“Afati që përfundon nesër është afati për konstituimin e Kuvendit, jo ai për arritjen e marrëveshjes për Presidentin. Po ashtu, ky afat është përcaktuar për përmbylljen e procedurës së konstituimit dhe jo për zhvillimin e negociatave politike. Pas konstituimit, subjektet parlamentare do ta kenë në dispozicion periudhën kushtetuese 60-ditore për të zhvilluar negociata dhe për të gjetur një zgjidhje që siguron zgjedhjen e Presidentit”, thuhet ndër të tjera në reagim.
KDI i ka bërë thirrje Lëvizjes Vetëvendosj, që si subjekti më i madh politik ta ushtrojë pa vonesë të drejtën dhe përjegjësinë për ta kushtetuese për ta propozuar kandidaturën për Kryetar të Kuvendit.
