Instituti Demokratik i Kosovës (KDI), organizatë e shoqërisë civile që monitoron punën e Kuvendit, ka shprehur shqetësim të thellë lidhur me mënyrën e zhvillimit të votimit gjatë vazhdimit të sotëm të seancës konstituive.
“Ndryshimi i mënyrës së votimit në mes të seancës, në mënyrë arbitrare nga kryesuesi dhe pa bazë në Rregulloren e Punës së Kuvendit, përbën shkelje të parimeve procedurale dhe një precedent të rrezikshëm për funksionimin e Kuvendit”, tha KDI në një reagim në Facebook duke shtuar se “ky veprim jo vetëm që bie ndesh me standardet e një legjislature demokratike, por minon edhe besimin publik në rregullsinë dhe integritetin e proceseve parlamentare”.
Sipas KDI-së, çdo përpjekje për të ndryshuar rregullat gjatë lojës, “veçanërisht kur vjen në funksion të kalkulimeve të brendshme politike”, dëmton rëndë autoritetin e Kuvendit.
KDI ka ftuar kryesuesin e seancës – deputetin e LVV-së, Avni Dehari si dhe të gjithë deputetët, që të respektojnë standardet procedurale të përcaktuara në Rregullore dhe të veprojnë në përputhje me normat e përgjegjësisë institucionale dhe politike që i kërkon funksioni përfaqësues.
Kryesuesi i seancës konstituive të Kuvendit të Kosovës, Avni Dehari, ka thënë se votimi i kryetarit të Kuvendit duhet të bëhet me votim të fshehtë.
Ai tha se duke u bazuar në Rregulloren e Kuvendit parashihet edhe votimi i fshehtë andaj tha se kjo është forma e duhur me qëllim të hapjes rrugë të zhbllokimit të procesit të konstituimit të Kuvendit.
Por, kjo u kundërshtua nga PDK-ja, LDK-ja dhe AAK-ja, parti këto që e quajtën këtë veprim antiligjor dhe antikushtetues.
Pas refuzimit të votimit të fshehtë, seanca u ndërpre dhe e njëjta do të vazhdojë të shtunën më 3 maj.
