Instituti Demokratik i Kosovës (KDI) ka vlerësuar se konstituimi i Kuvendit të Republikës së Kosovës është hap i domosdoshëm për funksionimin normal të institucioneve demokratike dhe tejkalimin e krizës institucionale në vend.
Megjithatë, KDI ka ngritur shqetësimin se konstituimi eventual i Kuvendit pas tejkalimit të afatit kushtetues 30-ditor paraqet një çështje të rëndësishme juridike, për të cilën, sipas këtij instituti, duhet të japë përgjigje Gjykata Kushtetuese.
Përmes një reagimi në Facebook, KDI ka rikujtuar se Gjykata Kushtetuese, në aktgjykimin e saj, ka përcaktuar se deputetët e zgjedhur duhet që “sa më shpejt dhe jo më vonë se tridhjetë (30) ditë” ta përfundojnë seancën konstituive të Kuvendit, duke zgjedhur kryetarin dhe nënkryetarët.
Sipas KDI-së, subjektet politike dhe deputetët nuk mund të përcaktojnë vetë kuptimin dhe efektin juridik të dispozitave kushtetuese dhe aktgjykimeve të Gjykatës Kushtetuese.
Për këtë arsye, instituti u ka bërë thirrje deputetëve dhe palëve të autorizuara që të kërkojnë sqarim mbi pasojat e tejkalimit të afatit 30-ditor, statusin juridik të konstituimit të Kuvendit pas skadimit të këtij afati dhe vlefshmërinë e veprimeve që Kuvendi do të ndërmarrë pas konstituimit.
KDI ka theksuar se kjo çështje nuk duhet të shihet vetëm në kontekstin e krizës aktuale, pasi, sipas tij, ajo ka rëndësi për mënyrën se si do të funksionojë rendi kushtetues i Kosovës edhe në të ardhmen.
“Një verdikt i ri i Gjykatës do t’u mundësonte deputetëve dhe institucioneve të veprojnë mbi të njëjtin interpretim të detyrimeve të tyre”, ka vlerësuar KDI.
Në fund, KDI ka theksuar se qytetarët e Kosovës kanë nevojë për institucione funksionale, por njëkohësisht edhe për institucione që veprojnë brenda rendit kushtetues./teve1.info/
