Instituti Kosovar për Demokraci (KDI) ka reaguar për arrestimin e tre personave që dyshohen për keqpërdorimin e blerjeve të rezervave shtetërore.
KDI këto arrestime i sheh si tregues të pranisë së korrupsionit në nivel të lartë.
“Arrestimet e sotme të personave të dyshuar për përfshirje në keqpërdorime me rezervat shtetërore, të menaxhuara nga Ministria e Industrisë, Ndërmarrësisë dhe Tregtisë, janë tregues i pranisë së korrupsionit të nivelit të lartë edhe në sferat më të ndjeshme, që kanë ndikim social të drejtpërdrejt në jetën e qytetarëve. Për më tepër, raste të tilla minojnë besimin e publikut në institucione”, thuhet në reagim.
Madje, KDI e sheh si të arsyeshme edhe lirimin nga detyra të ministrisë së Industrisë, Rozeta Hajdarin.
“Duke ditur ndjeshmërinë e rastit dhe përfshirjen e zyrtarëve të lartë ministror, KDI vlerëson se është i nevojshëm edhe lirimi nga detyra i ministres Rozeta Hajdari, për të mundësuar një proces penal efektiv e të pandikuar politikisht. Njëherit, KDI kërkon nga të gjithë akterët, e në veçanti zyrtarët në pushtet, që të rezervohen nga çfarëdo deklarimi apo përfshirje që mund t’a ndikojë procesin e hetimit dhe pavarësinë e institucioneve të drejtësisë”, thuhet mes tjerash në reagim.
Gjatë operacionit të sotëm nga Policia e Kosovës janë arrestuar dy zyrtarë të ministrisë dhe afaristi Ridvan Muharremi.
MINT thotë se mirëpret hetimet e Prokurorisë Speciale dhe se janë të bindur se furnizimi me rezerva shtetërore është bërë sipas ligjit.
Lidhur me këto zhvillime, ministrja e Industrisë, Rozeta Hajdari do të mbajë sot një konferencë për media në orën 18:00.
Në këtë konferencë, Hajdari pritet të flasë lidhur me arrestimet e fundit në MINT./teve1.info/
