Policia e Kosovës, ka themeluar klubin e basketbollit, i cili prej sezoniz 2025/26 do të bëjë gara nën ombrellën e Federatës së Basketbollit të Kosovës (FBK).
Me përkrahjen e Drejtorit të Përgjithshëm të Policisë së Kosovës, ka vazhduar themelimi i klubeve sportive të Policisë, këtë herë është themeluar Klubi i Basketbollit.
“Pas konsultimeve dhe në përputhje me rregulloren për organizimin e brendshëm, është zgjedhur struktura udhëheqëse e klubit (kryetari dhe sekretari). Gjithashtu, janë mbajtur dy seanca (grumbullime) stërvitore me lojtarë që do të përfaqësojnë Policinë e Kosovës në garat zyrtare”, thuhet në njoftimin e PK-së.
Me përkrahjen e plotë të Federatës së Basketbollit të Kosovës, si dhe pas përmbushjes së të gjitha kritereve të nevojshme për themelimin e klubit, Klubi i Basketbollit “Policia e Kosovës” nga ky vit do të jetë pjesë e garave shtetërore.
Mbetet të shihet se prej cilit rang të garave do të garoj KB “Policia e Kosovës”, por sigurisht që pritet të debutoj në Ligën e Dytë.
