Me plot 7.400 euro është gjobitur KB Bashkimi për incidentet që ndodhën në ndeshjen e së dielës ndaj Trepçës, e cila ishte e treta e serisë finale të “play-offit”.
Trepça triumfoi në Prizren dhe është larg një fitore larg titullit, me duelin e katërt që luhet sërish në Prizren, të mërkurën nga ora 19:30.
Bashkimi është gjobitur me 5.000 euro për “shkaktim i lëndimeve të lehta ndaj lojtarëve, zyrtarëve, gjyqtarëve apo vëzhguesve nga hedhjet e gjësendeve në fushën e lojës”.
Në fakt, me një mjet shpërthyes të hedhur pas ndeshjes, është goditur njëri prej gjyqtarëve të huaj dhe për këtë Bashkimi është dënuar me 5.000 euro.
Për shkelje të tjera, klubit nga Prizreni i janë dhënë dy gjoba nga 700 euro, pastaj nga një gjobë në vlerë prej 500, 300 dhe 200 eurosh.
Bashkimi të martën doli me një komunikatë, duke vlerësuar se veprimet e papërgjegjshme të individëve kanë ndikuar në atmosferën e ndeshjes dhe imazhin e klubit.
Po ashtu, klubi ka thënë se po punon për të identifikuar ata që bënë shkeljet për të cilat Bashkimi u dëmtua rëndë në aspektin financiar.
