Policia e Kosovës ka arrestuar katër persona të dyshuar për përfshirje në veprimtari të shitblerjes së narkotikëve gjatë një aksioni të zhvilluar të premten në Gjakovë.
Sipas njoftimit zyrtar, njësitë policore kanë realizuar bastisje në disa shtëpi dhe lokale që lidhen me personat e dyshuar, ku janë gjetur dhe sekuestruar sasi të konsiderueshme të substancave narkotike, armë, municion, para të gatshme dhe telefona mobilë.
“Gjatë bastisjes në cilësinë e provave materiale janë sekuestruar; Substancë e dyshuar narkotike e llojit kokainë në peshë rreth 293.96 gramë, substancë e dyshuar narkotike e llojit heroinë në peshë rreth 124 gramë, substancë e dyshuar narkotike e llojit marihuanë në peshë rreth 13 gramë, substancë e dyshuar narkotike (lloji i panjohur) në peshë rreth 116 gramë, një armë zjarri e shkurtë me dy fishekë, një pushkë ajrore pa numër serik, 90 fishekë kalibër të ndryshëm, para të gatshme në shumë 6536.76€, 474 dollarë amerikanë, dhe 60 franga zvicerane, si dhe pesë telefona mobil të llojeve të ndryshme”, thuhet në njoftim./teve1.info/
