Borës e Trepçës, që siguruan të mërkurën kalimin në gjysmëfinale të Kupës së Kosovës në basketboll, të enjten mbrëma do t’u bashkohen edhe dy skuadra të tjera.
Në garë janë katër skuadra, Sigal Prishtina, Vëllaznimi, GO+ Peja dhe Bashkimi, por vetëm Prishtina është më afër gjysmëfinales.
Bardhekaltrit e kishin fituar duelin e parë çerekfinal ndaj gjakovarëve, me rezultat të lartë 68:82. Avantazhi prej 14 pikëve i favorizon prishtinasit të cilët edhe luajnë para publikut të vet. Në fakt, tifogrupi Plisat nga e mërkura kanë marrë udhëheqjen e klubit, me liderin e tyre Rinor Grajqevci, i cili përkohësisht zë vendin e kryetarit të sapozgjedhur, Bekë Berisha, me këtë të fundit që për momentin nuk mund të ushtrojë dy funksione publike.
Ardhja e Plisave në krye të skuadrës ka bërë që të mobilizohen tifozët e skuadrës me synimin, rilthimin e lavdisë.
Kjo ndeshje do të luhet nga ora 18:45 në Pallatin e Rinisë dhe të Sporteve.
Në të njëjtin termin, por në Pejë zhvillohet njëra nga përballjet më interesante të Kupës së Kosovës. GO+ Peja – Bashkimi.
Takimin e parë e fituan portokallezinjtë 96:90, derisa sfida e dytë pritet të jetë e zjarrtë në Pejë, me të dy skuadrat që duan të kalojnë në rrethin e ardhshëm dhe të fitojnë trofeun e çmuar në basketbollin e Kosovës.
