Katër shtetas të Serbisë janë arrestuar në dy raste të ndara në rajonin e Gjilanit, nën dyshimin për kalim ilegal të kufirit.
Sipas njoftimit, rasti i parë është evidentuar dje rreth orës 10:40, në fshatin Pogragjë. Njësitë policore kanë ndaluar një veturë në të cilën ndodheshin dy persona të dyshuar, për të cilët dyshohet se kishin hyrë në territorin e Kosovës përmes rrugëve ilegale.
Me vendim të prokurorit, pas intervistimit, ata janë dërguar në mbajtje.
Rasti i dytë është regjistruar në fshatin Stublinë. Edhe në këtë rast, policia ka ndaluar një veturë me dy shtetas të Serbisë, të cilët dyshohet se kanë hyrë ilegalisht në Kosovë.
Në konsultim me prokurorin, rasti është iniciuar dhe të dyshuarit janë dërguar në mbajtje.
Autoritetet kanë bërë të ditur se veturat dhe telefonat celularë të të dyshuarve janë sekuestruar përkohësisht, ndërsa hetimet për zbardhjen e plotë të rrethanave po vazhdojnë.
