Një nga një hynë në sallën në të cilën e kishin thirrur konferencën. Kryetarët e komunave të cilat i drejton Lëvizja Vetëvendosje kësaj radhe u tubuan për të kundërshtuar padinë që Asociacioni i Komunave të Kosovës ka ngritur kundër Ministrisë së Arsimit e asaj të Shëndetësisë.
Në këtë konferencë morën pjesë kryetari i komunës së Podujevës Shpejtim Bulliqi, kryetari i Gjilanit, Alban Hyseni, ai i Shtimes, Qemajl Aliu dhe kryetari i komunës së Kamenicës, Kadri Rrahimaj.
Bulliqi i cili edhe e udhëhoqi konferencën, Asociacionin e Komunave të Kosovës e quajti vegël politike antiqeveritare.
“Ne si kryetar komunash nuk jemi palë në këtë padi sepse mendojmë se kjo padi do të kishte kuptimin po të bëhej në kohën e duhur dhe në adresat e duhura, që do të duhej të ishte drejtuar ndaj atyre ministrave që kanë nënshkruar dhe asnjëherë nuk kanë ndjekur rrugën ligjore për zbatimin e kësaj kontrate kolektive. Andaj mendojmë që inicimi i kësaj padie nga ana e Asociacionit të Komunave të Kosovës edhe njëherë dëshmon se ky Asociacion fatkeqësisht është kthyer në një vegël politike antiqeveritare dhe larg misionit të saj që ta përmbush qëllimin komunave dhe qytetarëve”, tha Bulliqi.
Madje Bulliqi ka bërë të ditur se nuk është qeveria Kurti ajo e cila i ka nënshkruar këto kontrata kolektive, për cka ka ushtruar padi edhe Asociacioni i Komunave.
“Në kohën e nënshkrimit të këtyre kontratave në Asociacionin kanë qenë po këta njerëz që menaxhojnë dhe udhëheqin me ta dhe ju e dini shumë mirë që asnjëherë nuk e kanë ngritur zërin për me mund me zgjidh këtë problem. Prandaj, ne si kryetar komunash mendojmë se krejt kjo çka është duke u bërë nga ana e këtij Asociacioni me qëllim që të krijohet edhe më tepër pakënaqësi lidhur me mos zbatimin e kontratës kolektive”, shtoi ai.
Krejt në fund Bulliqi ka shtuar se shpreson që të gjendet një zgjidhje për problemin e kontratës kolektive.
Kronika e gazetares Doresa Geci.
