Ministria e Mbrojtjes në Katar ka njoftuar se sulmi me raketa i Iranit ndaj bazës ajrore amerikane Al Udeid është penguar me sukses, falë sistemeve të mbrojtjes ajrore të vendit. Lajmin e ka konfirmuar përmes një postimi në platformën X zëdhënësi i Ministrisë së Jashtme, Majed al-Ansari, i cili e cilësoi sulmin si “shkelje flagrante të sovranitetit të Katarit dhe ligjit ndërkombëtar”.
Sipas tij, raketat iraniane u interceptuan dhe baza ishte evakuuar paraprakisht, çka bëri që të mos ketë viktima apo të lënduar. “U morën të gjitha hapat për të siguruar sigurinë e personelit, përfshirë forcat e Katarit dhe aleatëve ndërkombëtarë,” shtoi ai, duke paralajmëruar se Katarit i mbetet e drejta të përgjigjet ndaj këtij akti agresiv.
Aktualisht, hapësira ajrore e Katarit mbetet e mbyllur, ndërsa qytetarët amerikanë dhe britanikë janë këshilluar të qëndrojnë në strehim, si masë sigurie në vazhdim të zhvillimeve në rajon.
