Analisti politik, Afrim Kasolli vlerëson se shtyrja e vazhdueshme e seancës konstituive të Kuvendit nuk lidhet domosdoshmërisht me përpjekjet për arritjen e një marrëveshjeje politike, por me interesat strategjike të Lëvizjes Vetëvendosje.
Sipas tij, LVV po vëzhgon zhvillimet brenda subjekteve të tjera politike, veçanërisht në Lidhjen Demokratike të Kosovës, si dhe po përgatitet për mundësinë e zgjedhjeve të jashtëzakonshme.
“Shtyerja e seancës konstituive më tepër se në funksion të bisedimeve për ndonjë marrëveshje politike ka të bëjë realisht me interesat fillimisht të LVV-së për të parë se si po zhvillohen dinamikat në subjektet e tjera politike kryesisht në LDK për shkak të tensioneve ose eventualisht për të përgatitur skenarin për zgjedhjet e jashtëzakonshme në mënyrë që ta sforcojë më tepër narracionin se për kundër vullnetit të saj duke qenë se LDK-ja është peng i marur politik” ka thënë Kasolli në emisionin “Ditari” në Tëvë1.
Ai theksoi se zhvillimet e fundit në LDK mund të kenë pasoja të mëdha për këtë parti, duke shtuar se dobësimi i saj politik i ka sjellë përfitime elektorale Vetëvendosjes.
“Kjo që po ndodh në LDK është reflektim i gjitha këtyre dinamikave që unë besoj që do të jetë një goditje shumë e madhe për LDK-në edhe nëse arrin të mbijetojë politikisht Lumir Abdixhiku, nuk besoj që do të kalohen këto hatërmbetur aq lehtë dhe që do të jetë një situatë tejet e favorshme politike kryesisht për LVV sepse praktikat deri tanishme kanë dëshmuar që sa më shumë që dobësohet LDK aq më tepër përfiton elektorati LVV, besoj që është interes i VV-së ta sprovoj edhe njëherë fatin në zgjedhjet e reja”, ka shtuar ai.
Kasolli shtoi se pret vazhdimin e përpjekjeve për negociata politike, por nuk sheh ndryshime thelbësore në raportet mes partive.
“Unë pres inskenime të bisedimeve, pres inskenime dhe përpjekje që të riciklohen e njëjta skenë politike prej 9 shkurtit të vitit kaluar e deri më tani. Presim që LDK ta kalojë dramën e saj politike, por edhe nëse e kalon këtë dramë politike nuk e plotëson deri më tani kriterin formal politik të Kurtit që na duhen 86 deputetë për president”, deklaroi analisti./teve1.info/
