Një gjykatë e Kombeve të Bashkuara për krime lufte ka refuzuar një kërkesë nga Ratko Mlladiç, një udhëheqës ushtarak famëkeq serb i Bosnjës gjatë luftërave jugosllave të viteve 1992-1995, i cili mbikëqyri masakrën e Srebrenicës, për t’u liruar para kohe në Serbi për arsye shëndetësore.
Gjyqtarja, Graciela Gatti Santana në Mekanizmin Ndërkombëtar të Mbetur për Tribunalet Penale, gjykata e ngarkuar me trajtimin e çështjeve të mbetura nga gjykata jugosllave e krimeve të luftës, tha të martën se gjendja e Mlladiçit nuk përmbushte pragun e një “sëmundjeje akute terminale” të kërkuar për lirim të parakohshëm.
Mlladiç, i njohur si “Kasapi i Bosnjës”, u dënua me burgim të përjetshëm në vitin 2017 për gjenocid, krime lufte dhe krime kundër njerëzimit. Ai kishte paraqitur një kërkesë për lirim më 3 qershor 2025, duke thënë se i kishin mbetur vetëm disa muaj jetë.
“Unë pranoj që gjendja aktuale e Mlladiçit, e cila kërkon varësi nga të tjerët për aktivitetet e përditshme, është e pasigurt”, tha Santana në një vendim 12-faqësh të lëshuar në Hagë të martën, raporton Al Jazeera.
“Megjithatë, Mlladiç vazhdon të marrë kujdes shumë gjithëpërfshirës dhe të dhembshur, siç mbështetet gjerësisht nga raportet mjekësore.
“Informacioni që kam para syve tregon se rrethanat humanitare bindëse të përmendura nga Mlladiçi si bazë për lirimin e tij nuk janë të mbështetura.”
Mlladiç, 83 vjeç, u dënua nga Tribunali i OKB-së për ish-Jugosllavinë për rolin e tij në terrorizimin e popullsisë civile gjatë rrethimit 43-mujor të kryeqytetit boshnjak Sarajevë dhe masakrës së Srebrenicës në vitin 1995 .
Rreth 8,000 burra dhe djem myslimanë u masakruan në Srebrenicë nga forcat serbe të Bosnjës në korrik të atij viti.
