Mes vreshtave të rrushit, për të 12-in vit me radhë, në Rahovec u hap të premten festivali tradicional “Hardh Fest”, i cili edhe këtë vit sjell aktivitete të shumta kulturore, tradicionale dhe muzikore.
Zëdhënësja e Hardh Fest, Doruntina Gashi, ka thënë për KosovaPress për këto tri ditë sa zgjat, festivali synon promovimin e traditës dhe kulturës së Rahovecit, ndërsa si risi në këtë edicion është organizuar për herë të parë karnavali vreshtor.
“Ky është edicioni i 12-të i Hardhfest, kemi aktivitete të ndryshme që janë autentike dhe kanë për qëllim me përcjell traditën dhe kulturën të qytetit të Rahovecit. Si risi këtë vit e kemi pasur karnavalin vreshtor, që e kemi pasur për herë të parë në këtë edicion. Ka qenë diçka më madhështore në krahasim me vitet e kaluara. Ne gjithmonë e kemi pasur parakalimin e mekanizmave bujqësorë, mirëpo këtë vit e kemi pasur tamam karnaval.. Pastaj kemi vazhduar me prirjen ceremoniale të kalaveshit të rrushit, gara e shpejtësisë së vjeljes së rrushit dhe do vazhdojmë me aktivitete të tjera gjatë ditës”, thotë Gashi.
Përveç aktiviteteve tradicionale gjatë ditës, programi i festivalit përfshin edhe koncerte çdo mbrëmje nga ora 20:00. Sipas Gashit, secila natë e këtij edicioni është konceptuar të jetë e veçantë.
“Këtë vit secila natë është speciale, si nga pjesa e aktiviteteve por edhe nga pjesa e koncertit që fillon çdo mbrëmje nga ora 20:00. Sot e kemi Modern Talking, është njëri prej grupeve më të famshme ndërkombëtarisht, po ashtu edhe Vendim Kapaj, grupi që janë bërë të famshëm me filmin “Odisea” në Hollyood”, thotë ajo.
Gashi ka theksuar se veçantia e Hardh Fest qëndron te aktivitetet autentike që lidhen me kulturën, traditën, verën, rakinë dhe rrushin, të cilat, sipas saj, tërheqin interes të madh edhe nga turistët.
Ajo pret që numri i vizitorëve këtë vit të tejkalojë atë të edicionit të kaluar, kur, sipas një hulumtimi socio-ekonomik të realizuar nga organizatorët, festivali kishte mbledhur rreth 60 mijë vizitorë.
“Secili festival ka veçantinë e vet, por Hardh Fest është komplet ndryshe prej festivaleve të tjerave, sepse ka origjinalitetin që jo çdo festival ka, shkaku i aktiviteteve, që kanë për qëllim me e promovua kulturën e traditën tonë, me raki, ven e rrush, janë aktivitete që pëlqehen shumë, sidomos nga turistët… 3:14 Interesimi është goxha i madh dhe po besoj që do ta tejkalojmë vitin paraprak. Sipas një hulumtimi socio-ekonomik që kemi bërë vitin e kaluar, kemi pasur rreth 60 mijë vizitorë. Festivali jonë e ka si lloj tradite, secilin vit me tejkalua vitin paraprak”, thotë Gashi.
Hardh Fest ndër vite është kthyer në një nga ngjarjet më të rëndësishme kulturore e turistike në Rahovec, duke promovuar traditën e vreshtarisë, prodhimet vendore dhe trashëgiminë e kësaj treve.
Festivali do të zgjas deri më 6 shtator. /Kp
