Futbollistja e Kombëtares së Kosovës, Erëleta Memeti ka nënshkruar me ekipin gjerman Eintracht Frankfurt.
25-vjeçarja ishte pjesë e TSG Hoffenheim dhe ka nënshkruar një kontratë me SGE deri më 30 qershor 2027.
Erëleta, i kaloi tri vitet e fundit me TSG Hoffenheim, duke luajtur gjithsej 100 ndeshje në Bundesliga, ku ka shënuar 23 gola – përveç kësaj, ajo ka realizuar dhjetë gola në 16 ndeshje të Kupës gjermane, derisa në çerekfinale shënoi golin vendimtar kundër Wolfsburgut.
Sulmuesja energjike ka përfaqësuar Gjermaninë nga U16 deri në U20, por që nga viti 2019, Memeti vendosi të luajë për kombëtaren e Kosovës, të cilën tashmë e drejton si kapiten.
Dy vjet më parë, ajo u shpall Futbollistja e Vitit në Kosovë.
Për aventurën e re, Erëleta Memeti për faqen zyrtare të klubit nga Frankfurtit ka thënë se Eintrachti është një klub i nivelit të lartë.
“Stili i lojës dhe ideja e skuadrës së Niko Arnautis janë pikërisht në përputhje me stilin tim të shpejtë dhe dinamik. Jam e bindur se mund të ndihmoj skuadrën me cilësitë e mia. Qëllimi im është të luaj në majë të ligës dhe të sfidoj seriozisht Wolfsburgun dhe Bayernin. Jam shumë e emocionuar që nga vera do të jem pjesë e këtij klubi ambicioz“, ka thënë Memeti.
