Katër punonjës policie të Pikës kufitare të Kapshticës janë arrestuar pasi akuzohen se me mosveprimin e tyre kanë lejuar trafikun e drogës.
Gjithashtu në pranga ra edhe drejtuesi i mjetit që transportonte heroinën e sekuestruar në kufi..
Sipas Agjencisë së Mbikëqyrjes Policore 4 punonjësit e policisë akuzohen për “shpërdorim detyre” pasi me mosveprime dhe në shkelje të ligjit nuk kanë ushtruar kontroll ndaj mjetit
“U arrit të dokumentohej me prova përfshirja e punonjësve të policisë në trafikun ndërkombëtar të lëndës narkotike”, njofton AMP, ndërsa në pranga ranë:
-N / Komisar Ylli Dushku, me detyrë Përgjegjës Turni në Pikën e Kalimit Kufitar Kapshticë.
– Inspektor Franc Bylyku, me detyrë Specialist / Kontrollor në Pikën e Kalimit Kufitar Kapshticë.
– Inspektor Lirim Hymetllari, me detyrë Trupë Shërbimi në Pikën e Kalimit Kufitar Kapshticë.
– Inspektor Denjon Myteberi., me detyrë Trupë Shërbimi / Kontrollor në dalje të Pikës së Kalimit Kufitar Kapshticë, i cili dyshohet edhe për kryerjen e veprës penale “Prodhimi dhe mbajtja e armëve shpërthyese dhe municioneve”.
Gjithashtu u arrestua edhe Valmir Balliu, pas në mjetin që drejtonte iu gjet 6 kg e 134 gr lëndë narkotike e dyshuar “Heroinë”, 5 aparate celularë, 256 fishekë (pistoletë model TT), 20 fishekë armë gjahu model 12 dhe një automjet.
Materialet proceduriale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Korçë./rtsh.al/
