Mëngjesin e së martës, punëtorët e KEDS-it u panë në teren.
Në shoqërimin e tyre është edhe Njësia Speciale e Policisë së Kosovës.
Cak i tyre janë bizneset që dyshohet se po keqpërdorin energjinë elektrike.
E në një të tillë hasën qysh në ndalesën e parë në lagjen Arbëria në Prishtinë.
Për këtë u morën masa menjëherë.
E biznesi në fjalë nuk shpëtoi pa gjobë.
Ndërsa edhe në biznesin afër tregut të gjelbër u has në keqpërdorime.
Kjo pasi këtu u ndal rryma, por jo edhe pajisjet për ngrohje.
Prandaj edhe ndaj këtij biznesi u shqiptua gjoba.
E punë më shumë iu doli në një hotel në rrugën Maliq Pashë Gjinolli.
Por pavarësisht kërkimeve, në këtë vend u pa se gjithçka është në rregull.
“Në dy raste prej këtyre të triave u vërtetua se konsumatorët komercial po e keqpërdornin energjinë elektrike. Pra konsumatorët kishin bërë lidhje direkt me rrjet duke e anashkaluar njehsorin, që nënkupton se energjia elektrike që futej në rrjet, respektivisht në ato biznese nuk faturohej fare”, tha Lulzim Krasniqi, zëdhënës i KEDS-it.
Keqpërdorime të energjisë elektrike janë hasur me mijëra në Kosovë.
“KEDS-i ka intensifikuar aksionet kundër keqpërdorimit të energjisë elektrike. Vetëm vitin e kaluar psh janë realizuar mbi 96 mijë kontrolle anë e mbanë Kosovës, prej të cilave diku afër 5400 kanë rezultuar se janë keqpërdorime të energjisë elektrike”, ka thënë Krasniqi.
Sipas ligjeve në fuqi të Republikës së Kosovës, vjedhja e energjisë elektrike cilësohet si vjedhje e shërbimeve, çka sipas Kodit Penal është e dënueshëme me gjobë dhe deri në tre vjet burgim.
