Dogana e Kosovës ka zbuluar mallra të padeklaruara në vlerë prej rreth 27 mijë eurosh gjatë kontrollit të disa kamionëve në Pikën e Kalimit Kufitar në Han të Elezit.
Në njoftimin zyrtar thuhet se, gjatë kontrollit të dokumentacionit dhe verifikimit të ngarkesave, zyrtarët doganorë kanë konstatuar se një pjesë e mallrave nuk ishte përfshirë në deklaratat doganore.
Bëhet fjalë për sistemin e shkallëve rrëshqitëse për kabinat e automjeteve, i cili nuk ishte deklaruar, ndonëse sipas Doganës, pesha e përgjithshme e ngarkesës përputhej me atë të paraqitur në dokumentacion.
“Vlera e mallrave të padeklaruara, pa përfshirë detyrimet doganore dhe tatimore, është vlerësuar në rreth 27,000 euro”, thuhet në njoftim.
Dogana ka bërë të ditur se rasti është duke u trajtuar sipas procedurave ligjore në fuqi, në përputhje me Kodin Doganor dhe të Akcizave.
“Dogana e Kosovës rikujton se deklarimi i saktë dhe i plotë i të gjitha mallrave është obligim ligjor për të gjithë pjesëmarrësit në procedurat doganore. Çdo mospërputhje ndërmjet të dhënave të deklaruara dhe gjendjes faktike të mallrave i nënshtrohet verifikimit dhe trajtimit nga autoritetet doganore”, theksohet në fund të njoftimit./teve1.info/
