Zyrtarët policorë të rajonit të Prishtinës kanë vazhduar aktivitetet e tyre gjatë javës së kaluar në lokacione të ndryshme dhe përmes aksioneve të ndara.
Sipas njoftimit zyrtar, janë realizuar gjithsej 120 urdhëresa të gjykatës, prej të cilave 32 kanë të bëjnë me vepra penale, ndërsa pjesa tjetër lidhet me kundërvajtje, seanca gjyqësore dhe verifikime të ndryshme.
Pas përfundimit të procedurave, personat e dënuar me burgim janë dërguar për vuajtje të dënimit, ndërsa ata që ishin të dënuar me gjobë janë liruar pasi kanë përmbushur obligimet e përcaktuara në urdhëresa.
Në kuadër të aktiviteteve për rritjen e sigurisë, policia ka sekuestruar gjithashtu 10 armë zjarri të llojeve dhe kalibrave të ndryshëm, si dhe sasi të ndryshme municioni.
Ndërkohë, në fushën e sigurisë në trafik, gjatë së njëjtës periudhë janë shqiptuar 4,672 masa administrative me gjobë për kundërvajtje të ndryshme rrugore. Prej tyre, 590 janë evidentuar përmes veturave inteligjente dhe radarëve mobil.
