Pamje të grumbullimit të mbeturinave i ka shoqëruar gjatë së mërkurës qytetarët e Prishtinës.
Grumbull mbeturinash kësisoj janë parë edhe në shumë pjesë tjera të kryeqytetit.Krejt kjo pasi Kompania “Pastrimi” njoftoi se ka pezulluar punën në grumbullimin e mbeturinave.
Sipas tyre, këtë vendim e kanë marrë për shkak të borxhit prej 2.5 milionë euro që Komuna e Prishtinës ka ndaj tyre.
“Për më shumë se pesë muaj, Komuna nuk ka përmbushur obligimet financiare ndaj kompanisë, pavarësisht kërkesave tona të vazhdueshme dhe paralajmërimeve të përsëritura. Kjo situatë e ka bërë të pamundur mbulimin e kostove operative dhe vazhdimin normal të ofrimit të shërbimeve. PASTRIMI SH.A. i bën thirrje Komunës së Prishtinës që të veproj urgjentisht në shlyerjen e menjëhershme të detyrimeve dhe të rivendosë bashkëpunimin institucional në funksion të garantimit të shërbimeve bazike për qytetarët e kryeqytetit.”, KRM Pastrimi
Tëvë1 gjatë gjithë ditës ka tentuar të marrë një qëndrim nga menaxhmenti i kësaj Kompanie. Mirëpo kryeshefi ekzekutiv, Petrit Reçica ka qenë i paqasshëm përmes telefonit.
Por nga Komuna e Prishtinës, thonë se ndaj kësaj Kompanie nuk e kanë asnjë borxh.
Drejtori i Shërbimeve Publike, Bekim Brestovci thotë se nga kjo ndërmarrje nuk kanë pranuar nënshkrimin e kontratës për grumbullim të mbeturinave.
“Të njëjtën kërkesë e kemi ripërsëritur në shkurt të vitit 2025, fatkeqësisht nuk kanë ardhur prapë ta nënshkruajnë kontratën. Ata janë thirr në një plotësim-ndryshim të rregullores që është bërë në dhjetor të vitit 2024 të cilën ne për shkak të disa shkeljeve procedural dhe për shkak se bie në kundërshtim me Ligjin e Konkurrencës, por edhe me Kushtetutën e Republikës së Kosovës e kemi çuar në Gjykatë Kushtetuese, mirëpo këta janë thirrë në atë plotësim ndryshim të rregullores dhe në njëfarë forme kanë dashur të na thonë neve Komunës që nuk kemi të bëjmë me juve”, ka thënë Brestovci.
Ai paralajmëron masa ndaj kësaj Kompanie, derisa vlerëson se për shkak të inateve politike është bërë edhe ky vendim.
“Me ardhjen time si drejtor i Shërbimeve Publike dhe disa veprimeve që i kemi ndërmarrë, qoftë blerja e një mijë e 370 kontejnerëve në kontingjentin e parë dhe pastaj blerja e dy mijë e 500 kontejnerëve, qoftë kyqja e një operatori ekonomik privat të cilin e kemi bërë në vitin 2024 për ta tejkaluar një gjendje emergjente që ka qenë atëherë, natyrisht që oponentët politikë sidomos PDK nuk i ka shkuar shumë për shtati”, përfundoj Brestovci.
Nga niveli lokal u premtua se së shpejti do të gjejnë një rrugë alternative për evitimin e kësaj problematike.
