Kryetari i Shoqatës së Transportit Rrugor të Udhëtarëve, Jakup Berisha, tha se mbi njëmijë udhëtarë të Kosovës që po ktheheshin nëpër Serbi, po mbahen peng në territorin e Serbisë, raporton teve1.info
Berisha për teve1.info tha se nga dy udhëtarë prej secili autobus dhe përfaqësuesit e autobusëve janë futur në një objekt, i cili nuk dihet nëse i takon kufirit apo çfarë objekti është, ndërsa të njëjtëve u janë konfiskuar edhe dokumentet nga personeli doganor dhe policor serb.
Berisha tregoi se të gjithë udhëtarët tjerë janë urdhëruar të qëndrojnë nëpër autobusë tash e 12 orë.
Berisha tha se këto maltretime po ndodhin në hyrje të Serbisë nga kufiri me Hungarinë dhe Kroacinë.
“Sa i njoftova institucionet shtetërore të Kosovës para 10 min. Informatat sa vijën e shtohen sepse aty ndalohen të gjithë autobusët që vijnë prej perëndimit. Deri tash e kemi pas informatën vetëm për Suboticë ndërsa tash u rritë edhe Shid, hyrja prej Kroacisë në hyrje të Serbisë dhe janë mbase 12 orë të ndaluar autobusët. U janë konfiskuar dokumentacioni personelit të autobusëve dhe nga 2 udhëtarë prej secilit autobus u janë marrë dokumentet dhe janë marrë udhëtarë thuaja se peng dhe janë futur në një objekt që nuk e dimë a është ndërtesë e kufirit apo tjetër dhe udhëtarëve tjerë janë urdhëruar të mos dalin prej autobusit. Dmth këta të gjithë janë në territorin e Serbisë, e kanë kaluar kufirin e Serbisë. Këta nuk janë duke pritë me hy në Serbi, janë brenda territorit serb. Ashtu unë i kam njoftuar prej ministrit Liburnit, Durmishtit, drejtorin e departamentit të transportit që janë përgjegjës për transportin rrugor të udhëtarëve përmes MPJD-së duhet të kërkojnë ndihmë”, tha Berisha.
Ai shtoi se informatat i ka deri pas orës 8:00 në mëngjes, pasi edhe kontaktin me përfaqësuesit e autobusëve në këtë vend e ka të pamundur.
“Deri pas orës 8:00 në mëngjes i kam informatat për herë të fundit jam dëgjuar, kanë qenë 13 autobusë në Suboticë, secilit duhet t’i ketë minimalisht 50 udhëtarë, janë rreth 1000 udhëtarë tash nuk e di deri në këtë kohë sa janë”, u shpreh Berisha.