Batim Osmani, kandidat nga “Iniciativa Qytetare” për kryetar të Komunës së Mitrovicës Veriore, thotë që qytetarët përballen me presion nga “Lista Serbe” që të mos marrin pjesë në zgjedhje.
Osmani ka thënë se fajet për këto presione nuk i ka vetëm “Lista Serbe”, por edhe institucionet e Kosovës, pasi që sipas tij, i kanë lejuar këtij subjekti hapësirë të pakontrollueshme.
“Po, këtu kanë pasur presion dhe kanë presion të rregullt, edhe te qytetarët, edhe te konkurrenca e listave, tek iniciativat, gjithmonë kanë pasur presion. Jo vetëm tash, por kanë pasur presion që prej ditës së themelimit. Por, tashmë nuk mundet t’ia hedhësh vetëm atyre fajin. Fajet sa i kanë ‘Lista Serbe’, i kanë edhe institucionet tona që nga 2010-ta, ku ju kanë lënë hapësirë të pakontrollueshme. D.m.th., nuk ka pasur sistem të kontrollit se çfarë po ndodh me qytetarët e saj jo vetëm në veri, por në të gjithë territorin e Kosovën ku kanë pasur kërcënime në gjithë territorin e Kosovës në qoftë se nuk dalin në votime dhe nëse nuk e votojnë ‘Listën Serbe’”, ka thënë Osmani në emisionin “Ditari” në Tëvë1.
Sipas tij, institucionet e Kosovës kanë pasur mundësi të reagojnë, por prapë ai shpreson te mbështetja e ndërkombëtarëve që të arrijë synimet në fitore.
“Institucionet tona kanë pasur mundësi të reagojnë, por nuk kanë reaguar deri tash edhe besoj që ky është një lloj ‘shkolle’, por edhe po na i ‘hapin sytë’ institucioneve tona që duhet me reagu në kohë. Tash është pak vonë, por besoj që me mbështetjen e ndërkombëtarëve do të ia arrijmë”, tha ai.
Për zgjedhjet në veri është mbyllur afatit për njoftim të partive politike se nuk duan të marrin pjesë në zgjedhjet e 23 prillit në katër komunat veriore, ndërsa “Lista Serbe” nuk ka njoftuar zyrtarisht se nuk do të marrë pjesë në këto zgjedhje.
