Kandidati i AAK-së për kryetar të Komunës së Kamenicës, Faton Jakupi, në emisionin “Info Nata” në Tëvë1, ka shpalosur planin e tij për zhvillimin e infrastrukturës arsimore në komunë, duke theksuar rëndësinë e përfundimit të projekteve ekzistuese dhe rritjes së sigurisë në shkolla.
“Është në ndërtim e sipër shkolla e qytetit ‘Fan Noli’, e cila do të duhej të kishte një vëmendje më të madhe nga Ministria e Arsimit që ndërtimi i saj të përfundojë sa më shpejt, e jo të zvarritet me vite. Pas përfundimit, do të fillojë edhe procesi i inventarizimit dhe digjitalizimit të saj,” tha Jakupi.
Ai shtoi se digjitalizimi dhe restaurimi i shkollave ekzistuese është pjesë e programit të tij.
“Do të bëjmë gjithashtu edhe restaurimin e shkollave ekzistuese, dhe do të implementojmë procesin e digjitalizimit. Një tjetër premtim për shkollat është garantimi i sigurisë qoftë përmes pranisë fizike, qoftë përmes një sistemi kamerash që do të lidhen me stacionin policor të komunës. Siguria në shkolla është prioritet,” theksoi ai.
Sa i përket infrastrukturës së hershme edukative, Jakupi tha se është drejt përfundimit ndërtimi i një çerdheje publike në qytet.
“Kamenica në qytet ka një çerdhe publike, e cila është në fazën përfundimtare vetëm se nuk ka nisur punën ende. Po ashtu, është në ndërtim edhe një tjetër çerdhe në lagjen ‘Llogar’. Ndërkohë, në fshatrat përreth do të bëjmë një vlerësim nëse ekziston nevoja për çerdhe të reja,” përfundoi Jakupi.
