Kancelari gjerman, Friedrich Merz ka thënë të martën se strategjia e re e sigurisë kombëtare e administratës Trump nënvizon nevojën që Evropa të bëhet “shumë më e pavarur” nga Shtetet e Bashkuara për sa i përket politikës së sigurisë.
Merz kundërshtoi poashtu idenë se demokracia evropiane ka nevojë për shpëtim, shkruan AP.
Strategjia amerikane, e publikuar të premten, i paraqet aleatët evropianë si të dobët, dhe jep kritika ndaj politikës evropiane të fjalës së lirë dhe migracionit.
Të hënën, Presidenti i Këshillit Evropian, António Costa, paralajmëroi SHBA-në kundër ndërhyrjes në punët e Evropës dhe tha se vetëm qytetarët evropianë mund të vendosin se cilat parti duhet t’i qeverisin ata.
Merz, udhëheqësi i kombit më të populluar të Bashkimit Evropian dhe ekonomisë së tij më të madhe, tha se nuk ishte i befasuar nga përmbajtja e strategjisë pasi ajo ishte kryesisht në përputhje me një leksion që zëvendëspresidenti i SHBA-së JD Vance mbajti para aleatëve evropianë në Mynih në shkurt.
Pjesë të dokumentit janë të kuptueshme, por “disa prej tyre janë të papranueshme për ne nga pikëpamja evropiane”, u tha ai gazetarëve në qytetin perëndimor gjerman të Mainzit.
“Që amerikanët duan të shpëtojnë demokracinë në Evropë tani, nuk shoh ndonjë nevojë për këtë”, tha Merz. “Nëse do të duhej të shpëtohej, ne do ta menaxhonim vetë.”
Ai shtoi se dokumenti i ri i SHBA-së “konfirmon vlerësimin tim se ne në Evropë, dhe kështu edhe në Gjermani, duhet të bëhemi shumë më të pavarur nga SHBA-të në aspektin e politikës së sigurisë. Kjo nuk është një surprizë, por tani është konfirmuar përsëri. Është dokumentuar.”
