“Kanadaja vazhdon të mbështesë Ukrainën ndërsa mbron territorin, sovranitetin dhe pavarësinë e saj nga Rusia,” tha kryeministri Justin Trudeau nga Indonezia, ku po merr pjesë në Samitin e G20.
“Kjo ndihmë ushtarake shtesë do të mbështesë ukrainasit ndërsa ata vazhdojnë me guxim të luftojnë kundër Vladimir Putin-it. Pushtimi i paligjshëm, ndërsa këto sanksione të reja do të bëjnë presion të shtuar mbi ata që mbështesin këto akte lufte.”
Rusët e sanksionuar janë anëtarë të sektorit të drejtësisë dhe sigurisë, duke përfshirë oficerë policie dhe hetues, prokurorë, gjyqtarë dhe zyrtarë të burgjeve të përfshirë në “shkelje të rënda dhe sistematike të të drejtave të njeriut kundër liderëve të opozitës ruse”, thuhet në një deklaratë nga zyra e kryeministrit.
Melanie Joly, ministrja e Punëve të Jashtme të Kanadasë, tha se sanksionet ishin ndëshkim për persekutimin e opozitës, veçanërisht Vladimir Kara-Murza.
“Sot, ne po sanksionojmë ata që janë përgjegjës për persekutimin e disidentit trim rus Vladimir Kara-Murza,” tha ajo. “Kanadaja do të vazhdojë të jetë e palëkundur në mbështetjen tonë për Ukrainën në luftën e saj për liri.”
Kara-Murza, një aktivist politik dhe gazetar, është arrestuar që nga prilli 2022 për pikëpamjet e tij kundër luftës dhe është akuzuar për tradhti të lartë, raportoi Amnesty International në tetor.
Organizata për të drejtat e njeriut tha se atij iu dha çmimi Vaclav Havel për të drejtat e njeriut nga Asambleja Parlamentare e Këshillit të Evropës.
Sanksionet e reja kundër rusëve janë shtesë ndaj atyre të vendosura nga Kanada ndaj 1.400 individëve dhe subjekteve që kur Rusia filloi aksionin e saj ushtarak kundër Ukrainës nëntë muaj më parë.
Fondet shtesë prej 500 milionë dollarë kanadezë synohen për ndihmën ushtarake për Ukrainën – komunikime, pajisje, karburant dhe furnizime mjekësore./AA
