Qytetarët dhe pjesëmarrësit në trafik, veçanërisht në rajonin e Ferizajt, duhet të kenë parasysh kufizime të përkohshme të qarkullimit më 24 dhe 25 qershor, për shkak të organizimit të Kampionatit të Kosovës në Çiklizëm 2026.
Sipas njoftimit të Ministrisë së Infrastrukturës dhe Transportit, garat do të zhvillohen në aksin Ferizaj – HIB Petrol në Bibaj, duke përfshirë segmentin e autostradës “Arbër Xhaferi”, si dhe rrugët që lidhin Ferizajn, Hanin e Elezit dhe Trudën.
Më 24 qershor do të zhvillohet gara individuale me kronometër (ITT). Starti është planifikuar në orën 10:00 në relacionin Ferizaj – HIB Petrol, Bibaj – Babush, ndërsa gara do të zhvillohet përgjatë segmentit të autostradës “Arbër Xhaferi”. Përfundimi i saj pritet rreth orës 12:00.
Ndërkohë, më 25 qershor do të mbahet gara rrugore (Road Race), e cila do të nisë në orën 10:00 nga Ferizaj/Bibaj në drejtim të Hanit të Elezit. Çiklistët do të vazhdojnë itinerarin drejt Ferizajt dhe më pas në Trudë. Gara do të ketë një gjatësi prej 100 kilometrash, ndërsa përfundimi është paraparë rreth orës 13:00 në Trudë.
Autoritetet u bëjnë thirrje qytetarëve dhe drejtuesve të automjeteve që të respektojnë udhëzimet e Policisë së Kosovës, organizatorëve të garës dhe sinjalizimin e vendosur përgjatë rrugëve ku do të zhvillohet aktiviteti.
Ministria e Infrastrukturës dhe Transportit thekson se organizimi i këtij kampionati synon promovimin e sportit të çiklizmit dhe zhvillimin e aktiviteteve sportive në përputhje me standardet e sigurisë./teve1.info/
